На базе гісторыка-культурнага комплексу «Лошыцкі» прайшоў выязны семінар Палаты прадстаўнікоў. На парадку дня — пытанні ўдасканалення заканадаўства ў галіне шлюбна-сямейных адносін з улікам перспектыў укаранення аўтаматызаванай інфармацыйнай сістэмы ЗАГС.

Каб вярнуць бацькоўства ў трэнды

Падобныя семінары па тых ці іншых кірунках удасканалення нашага заканадаўства праводзяцца Палатай прадстаўнікоў рэгулярна. Дарэчы, месца для правядзення чарговага мерапрыемства было выбрана невыпадкова — многія беларусы выбіраюць «Лошыцкі» для правядзення свайго вяселля, заключэння шлюбу. 

У верасні мінулага года рэканструяваны гісторыка-культурны комплекс наведаў кіраўнік дзяржавы і неаднаразова падкрэсліваў, што сям’я — гэта працяг не толькі нечага прозвішча, але і ўсяго беларускага народа, адзначыў Старшыня Палаты прадстаўнікоў Нацыянальнага сходу Ігар Сергяенка: «Культ паўнавартаснай сям’і з двума і больш дзецьмі павінен стаць стылем жыцця. Як адзначыў Прэзідэнт на нарадзе з кіраўніцтвам Савета Міністраў, мацярынства і бацькоўства павінны стаць модным трэндам. Формула простая: двое бацькоў — двое дзетак. Толькі так мы можам быць упэўненыя, што наступныя пакаленні будуць працягвацца, а значыць, будуць моцна трымаць суверэнітэт у сваіх руках і гарантавана жыць у міры».

Кодэкс аб шлюбе і сям’і не з’яўляецца прамым інструментам для павышэння нараджальнасці або вырашэння дэмаграфічных задач, але ён фарміруе надзейныя прававыя гарантыі для абароны шлюбу і правоў кожнага члена наваспечанай сям’і. А гэта, у сваю чаргу, умацоўвае шлюбныя адносіны і робіць іх больш прывабнымі для нараджэння дзяцей. 

Пытанні — актуальныя, карэкціроўкі — своечасовыя

Мэта дапрацоўкі дакумента — у тым, каб абноўлены кодэкс эфектыўна праслужыў краіне не адзін дзясятак гадоў. «Некалькі гадоў таму мы прынялі закон, які прадугледжвае карэкціроўку асобных палажэнняў Кодэкса аб шлюбе і сям’і. Змяненні закранулі шырокі спектр пытанняў, насілі кропкавы характар: ад маёмасных інтарэсаў непаўналетніх да рэгістрацыі актаў грамадзянскага стану. Але сёння наспела неабходнасць комплекснага ўдасканалення кодэкса як з улікам напрацаванай правапрымяняльнай практыкі, так і тэхналогій, якія рушылі наперад», — растлумачыў Ігар Сергяенка.

У Палату прадстаўнікоў, паводле яго слоў, паступаюць прапановы аб зменах у кодэксе. Усе яны змяшчаюць важкія абгрунтаванні для ўнясення шэрагу карэктыў, знаходзяць жывы водгук сярод дэпутатаў. У сувязі з гэтым Пастаянная камісія па ахове здароўя, фізічнай культуры, сямейнай і маладзёжнай палітыцы гатова заняцца распрацоўкай праекта закона па карэкціроўцы Кодэкса аб шлюбе і сям’і. 

У сваю чаргу, старшыня Мінгарвыканкама Уладзімір Кухараў адзначыў, што дзякуючы семінару, комплекснаму абмеркаванню актуальных пытанняў сферы шлюбна-сямейных адносін, атрымаецца знайсці шляхі іх вырашэння, прыняць у далейшым неабходныя для гэтага адпаведныя нарматыўныя прававыя акты.

На парозе сур’ёзнай трансфармацыі

Штогод органы і падраздзяленні ЗАГС нашай краіны выконваюць 15 відаў працэдур, афармляюць каля 300 тысяч запісаў актаў грамадзянскага стану і прымаюць каля 700 тысяч зваротаў грамадзян. Але ўяўленне аб ЗАГСе як аб установе, дзе ўсё абмяжоўваецца фармальнымі працэдурамі і дакументамі, даўно павінна застацца ў мінулым. Развіваецца грамадства, мяняюцца грамадскія адносіны, і ЗАГСы не могуць — і не павінны — заставацца ў баку ад гэтых працэсаў, адзначыў міністр юстыцыі Яўген Каваленка.

«Мы стаім на парозе сур’ёзнай трансфармацыі. Наша мэта — стаць паўнавартасным звяном лічбавай дзяржавы, якая будуецца ў Рэспубліцы Беларусь. Найперш гэта датычыцца пераводу ў лічбавы фармат усіх запісаў актаў грамадзянскага стану, а іх больш за 26 мільёнаў. Да цяперашняга моманту ў краіне алічбавана ўжо больш за 40 % гэтых запісаў», — падкрэсліў Яўген Каваленка. Дапамогуць у гэтай няпростай справе і нейрасеткі, якія сёння здольныя расшыфроўваць нават рукапісны тэкст, а таксама за секунды апрацоўваць інфармацыю і адпраўляць яе ў адзіную дзяржаўную сістэму.

Міністр юстыцыі таксама падкрэсліў: «Нам неабходна стварыць адзінае лічбавае асяроддзе, у якім інфармацыя аб ключавых жыццёвых падзеях чалавека была б даступная імгненна, надзейна абаронена ад любых замахаў і інтэгравана ў агульную сістэму аказання дзяржаўных паслуг». Напрыклад, стварэнне такой сістэмы дазволіць пры нараджэнні дзіцяці вырашаць усе спадарожныя пытанні (запіс у дзіцячы садок, афармленне дапамог і г. д.) без чэргаў і шматлікіх даведак. Менавіта для гэтага ўжо сёння неабходна рашыць як тэхнічную, так і заканадаўчую задачы.

Першым на новую лічбавую платформу ЗАГС да канца года пяройдзе Мінск. А далей — больш: адзіная сістэма ў перспектыве ахопіць усю краіну, і даныя з любога кутка Беларусі будуць імгненна даступныя ў агульнай лічбавай прасторы.

Аміна НАЗАРАВА

Фота БелТА