Міністр унутраных спраў Іван Кубракоў на аператыўнай нарадзе загадаў перагледзець рашэнні па парушэннях Правілаў дарожнага руху для некаторых грамадзян і «ўзмацніць жорсткасць» пакарання.

Як паведамілі ў афіцыйным тэлеграм-канале МУС Беларусі, міністр «акцэнтаваў увагу на прынцыповым і справядлівым падыходзе пры разглядзе парушэнняў ПДР».

«Там, дзе дробнае парушэнне і ёсць змякчальныя акалічнасці — ісці насустрач чалавеку. Але пры наяўнасці грубых і шматлікіх парушэнняў — патуранняў і мінімальных штрафаў для «блатных» быць не павінна! — сказаў Кубракоў.

Міністр даручыў «перагледзець вынесеныя падобныя рашэнні ў бок узмацнення жорсткасці».

Кіраўнік МУС назваў гэта «пытаннем справядлівасці». І падкрэсліў: «Так, недзе можна пайсці насустрач. Дзіця інвалід, яшчэ нейкія моманты. Там трэба пайсці. Але вось гэтай блатаце ўсёй — ні ў якім разе».

«Цалкам падымайце ўсе матэрыялы, дзе не прыменены меры пазбаўлення за грубае парушэнне правілаў дарожнага руху. І па новай глядзіце», — заявіў Кубракоў на нарадзе.

Ён падкрэсліў, што «там, дзе яшчэ тэрміны не выйшлі, можна звярнуцца да пракурора, звяртайцеся».

«Але пастаўце, калі ласка, гэтых „дамарослых блатных“ на месца», — загадаў міністр.