Ніякіх змен у працэсе правядзення ўступных іспытаў не прадугледжана. Аб гэтым журналістам расказаў міністр адукацыі Андрэй Іванец перад пасяджэннем дзяржаўнай камісіі па кантролі за ходам падрыхтоўкі і правядзення ўступных іспытаў ва ўстановах адукацыі ў 2025 годзе, перадае БелТА.
Андрэй Іванец падкрэсліў, што, як і ў мінулым годзе, тэрміны правядзення цэнтралізаванага экзамену і цэнтралізаванага тэсціравання будуць адзіныя для таго, каб стварыць самыя спрыяльныя ўмовы для выпускнікоў як гэтага года, якія будуць паступаць ва ўніверсітэты, так і для тых хлопчыкаў і дзяўчынак, якія не паступілі ў папярэднія гады.
«Пры гэтым хацеў бы нагадаць, што першы цэнтралізаваны экзамен пройдзе па прадмеце на выбар, а другі — па рускай і беларускай мове», — адзначыў міністр.
Цэнтралізаваныя экзамены пройдуць 26 і 29 мая, а тэсціраванне — 2 і 5 чэрвеня.
Кіраўнік Мінадукацыі дадаў, што ў Беларусі створаны неабходныя ўмовы для прыцягнення адораных і матываваных хлопчыкаў і дзяўчынак для паступлення без экзаменаў — гэта адзін з напрамкаў работы ведамства па прыцягненню абітурыентаў у беларускія ВНУ.
