«Нязменнымі прыярытэтамі для нас былі і застаюцца даступнасць і якасць адукацыі, — падкрэсліў міністр. — Мы павінны для бацькоў стварыць умовы, каб дзеткі маглі наведваць як групы кароткачасовага знаходжання, так і наадварот, каб былі адпаведныя групы, якія працуюць 12 гадзін у суткі, каб бацькі маглі спакойна працаваць і выхоўваць сваіх дзяцей». 

Як сказаў міністр, вельмі важна стварэнне інклюзіўнага асяроддзя: гэтая катэгорыя дзяцей таксама знаходзіцца ў пастаянным полі зроку, таму што дзеці, якія маюць асаблівыя адукацыйныя патрэбы, патрабуюць дакладна такой жа нашай увагі і стварэння такіх жа камфортных умоў і для навучання, і для сацыялізацыі.

«Што да каледжаў, практыкаарыентаванасць павінна стаяць у аснове ўсяго. Мы сёння бачым дастаткова высокую запатрабаванасць каледжаў у нашых абітурыентаў. Гэта паказала ўступная кампанія. Разам з тым у гэтай сферы неабходна зрабіць акцэнт на ўзаемадзеянні з рэальным сектарам эканомікі, пашырэнні сеткі навучальных майстэрняў на прадпрыемствах, мадэрнізацыі дзейных цэнтраў кампетэнцый і, безумоўна, праходжанні аплатнай практыкі. Усё гэта павінна стаць складнікамі поспеху, каб кожны малады чалавек пасля заканчэння каледжа змог прыйсці на першае працоўнае месца абсалютна гатовым спецыялістам, адаптаваным да рэальных умоў вытворчасці», — адзначыў Андрэй Іванец.

Міністр асабліва акцэнтаваў увагу на тым, што ў аснове ў сістэме адукацыі застаецца выхаванне асобы, грамадзяніна, патрыёта. Гэтую работу павінны праводзіць, пачынаючы з дзіцячага сада, школьнай лавы, далей у каледжах, ВНУ, таму што ад таго, якой будзе наша моладзь, залежыць тое, якой будзе краіна.

Андрэй Іванец адзначыў, што Гродзенская вобласць — лідар у краіне па аснашчанасці сродкамі навучання ўстаноў дашкольнай адукацыі. Тут сістэмна вядзецца ідэалагічная, выхаваўчая работа, укладваюцца максімальныя намаганні ў забеспячэнне высокай якасці адукацыі. Пацвярджэннем таму стала тое, што па выніках 2025 года галоўнае ўпраўленне адукацыі Гродзенскага аблвыканкама заняло першае месца сярод усіх профільных структурных падраздзяленняў краіны.