«Прэзідэнт вельмі выразна даў пасыл: адукацыя з’яўляецца дзяржаваўтваральнай галіной. І менавіта дзяржава павінна каардынаваць і ажыццяўляць кантроль гэтай дзейнасці на ўсіх узроўнях адукацыі. Так было і ў савецкія часы і, безумоўна, так павінна быць і сёння, — сказаў міністр. — Мы падыходзім вельмі ўзважана да ліцэнзавання. Улічваючы, што ліцэнзія выдаецца на бестэрміновы перыяд, мы не бачым ніякіх праблем ні з пункту гледжання адміністравання дадзенай працэдуры, ні з пункту гледжання выдаткаў — як чалавечых, так і фінансавых — на яе ажыццяўленне».
У цяперашні час у Беларусі ліцэнзуюцца пяць з шасці ўзроўняў асноўнай адукацыі (дашкольная, агульная сярэдняя, прафесійна-тэхнічная, сярэдняя спецыяльная і вышэйшая адукацыя), а таксама тры адукацыйныя праграмы дадатковай адукацыі дарослых (павышэнне кваліфікацыі кіруючых работнікаў і спецыялістаў, перападрыхтоўка на ўзроўні вышэйшай адукацыі, перападрыхтоўка на ўзроўні сярэдняй спецыяльнай адукацыі). Міністэрства адукацыі ў працэсе падрыхтоўкі ва ўрадзе законапраекта ў сферы ліцэнзавання прапанавала пашырыць пералік ліцэнзуемых адукацыйных паслуг, уключыўшы ў яго дадатковую адукацыю дзяцей і моладзі.
«Кожны бацька, які адпраўляе сваё дзіця ва ўстанову адукацыі, незалежна ад узроўню, няхай гэта будзе дзіцячы сад, школа, каледж ці ўніверсітэт, хоча, каб яно было ў бяспецы і атрымала якасную адукацыю. І дадатковая адукацыя дзяцей і моладзі не з’яўляецца выключэннем. Таму прапанаваныя нормы аб увядзенні ліцэнзавання не з’яўляюцца залішнімі. Яны накіраваны на забеспячэнне мінімальных патрабаванняў, якія прад’яўляюцца наогул да правядзення адукацыйнага працэсу. Гэта наяўнасць адпаведных памяшканняў, санітарна-гігіенічных заключэнняў, наяўнасць кваліфікаваных педагагічных кадраў», — сказаў міністр.
Андрэй Іванец канстатаваў, што ў Беларусі дзейнічае вельмі разгалінаваная сістэма дадатковай адукацыі дзяцей і моладзі. Акрамя шматлікіх дзяржаўных устаноў, у гэтай сферы працуе і каля 500 прыватных арганізацый. «Каб пачаць гэты від дзейнасці, неабходна прайсці ўзгадненне адукацыйных праграм у мясцовых выканаўчых органах улады. Таму гэта (прапанова аб ліцэнзаванні. — Заўв. БелТА) — фактычна фармалізацыя той работы, якая сёння і так ажыццяўляецца ў нас на месцах, — заявіў кіраўнік Мінадукацыі. — Дзяржава стварае ўсе ўмовы для таго, каб у пазаўрочны час нашы дзеці маглі займацца абсалютна па ўсіх напрамках. Кожны бацька мае права выбіраць. А мы ўжо павінны змагацца за кожнае дзіця, таму што якасць, разнастайнасць і прапанаваныя праграмы павінны быць адзінымі арыенцірамі для нашых дзяцей і бацькоў».
