Па благаславенні Мітрапаліта Мінскага і Заслаўскага Веніяміна, Патрыяршага Экзарха ўсяе Беларусі, у межы Слуцкай епархіі 7 красавіка прыбыў каўчэг з часцінкай Пояса Прасвятой Багародзіцы і часцінкамі мошчаў бацькоў Прасвятой Дзевы Марыі — святых праведных Іаакіма і Ганны.

Сёння, 7 красавіка, святыня будзе знаходзіцца ў Кафедральным саборы Архістратыга Міхаіла ў горадзе Слуцку на вул. Сацыялістычнай, 90. Пакланіцца ёй можна ў храме да 18.00.

У 19.00 гэтага ж дня Пояс Прасвятой Багародзіцы будзе дастаўлены ў кафедральны сабор Раства Хрыстова ў Салігорску, размешчаным на вул. К. Заслонава, 37, дзе будзе знаходзіцца да 17.00 8 красавіка. 

Як паведамляе прэс-служба Беларускай Праваслаўнай Царквы, каўчэг з часцінкай Пояса Прасвятой Багародзіцы і часцінкамі мошчаў бацькоў Прасвятой Дзевы Марыі з 4 сакавіка праехаў па тэрыторыі Мінскай, Барысаўскай, Маладзечанскай, Віцебскай, Полацкай, Гродзенскай, Лідскай і Брэсцкай епархій. Апошнімі святыні змогуць пакланіцца прыхаджане храмаў Магілёўскай епархіі, дзе каўчэг прабудзе з 9 па 10 красавіка.