Педагагічная паэма пачынаецца тут
БДПУ ўваходзіць у лік найстарэйшых вышэйшых навучальных устаноў Беларусі — 21 лістапада 2026 года ён адзначыць 112-годдзе з дня заснавання. Сёння гэта не проста ВНУ, а вялікі адукацыйны, навукова-даследчы і сацыякультурны комплекс, у якім актыўна развіваюцца інавацыі, сучасныя тэхналогіі і навуковыя даследаванні, падкрэслівае рэктар універсітэта Аляксандр ЖУК. У структуры БДПУ 9 факультэтаў, 3 інстытуты (псіхалогіі, інклюзіўнай адукацыі, а таксама павышэння кваліфікацыі і перападрыхтоўкі), аспірантура і дактарантура, рэспубліканскія рэсурсныя і адукацыйныя цэнтры, шэраг іншых падраздзяленняў.
Падрыхтоўка ў ВНУ вядзецца па 29 спецыяльнасцях. Цяпер іх атрымліваюць 8712 студэнтаў і 612 магістрантаў. Яшчэ 123 чалавекі навучаюцца ў аспірантуры і дактарантуры. Адукацыйны працэс забяспечваюць 657 спецыялістаў, сярод якіх 40 дактароў навук і 310 кандыдатаў навук.
Асаблівае значэнне ў развіцці БДПУ мае навуковая дзейнасць — тут функцыянуюць 15 навукова-педагагічных школ, а за пяць гадоў вучоныя ўніверсітэта выканалі больш за 300 навуковых тэм па праграмах рознага ўзроўню. Вынікі гэтай працы шырока ўкараняюцца ў адукацыйную практыку.
Важнай часткай універсітэцкага жыцця застаюцца сацыяльныя і культурна-адукацыйныя праекты. Сярод іх вядомыя «Зорныя паходы» па месцах баявой і працоўнай славы беларускага народа.
Актыўна развіваецца і міжнароднае супрацоўніцтва. БДПУ заключыў 190 міжнародных дагавораў з універсітэтамі 24 краін, а агульная колькасць замежных студэнтаў сёння складае больш за тысячу.
Важны паказчык дзейнасці ўніверсітэта — запатрабаванасць яго выпускнікоў, лічыць Аляксандр Жук.
— Хацелася б адзначыць такі важны факт, што ўсе нашы выпускнікі запатрабаваныя. У нас стапрацэнтнае размеркаванне. За нашымі выпускнікамі стаяць чэргі! А яшчэ адным паказчыкам запатрабаванасці падрыхтоўкі нашых кадраў з’яўляецца іх замацаванне на працоўных месцах.
У БДПУ адзіны дзень адчыненых дзвярэй пройдзе ў рамках агульнарэспубліканскай акцыі «Я выбіраю прафесію». Будуць працаваць прэзентацыйныя пляцоўкі з удзелам заказчыкаў кадраў і факультэтаў універсітэта, дзе абітурыенты змогуць даведацца пра магчымасці мэтавага навучання, запатрабаваныя спецыяльнасці і перспектывы працаўладкавання.
Урачы новага пакалення
Беларускі дзяржаўны медыцынскі ўніверсітэт — вядучая навучальная ўстанова, дзе атрымліваюць вышэйшую адукацыю «вартавыя» нашага здароўя. Сёння тут навучаецца больш за восем тысяч студэнтаў. У ВНУ працуе звыш 2200 чалавек, у тым ліку 1165 выкладчыкаў, сярод якіх 114 дактароў навук і 550 кандыдатаў навук, што адпавядае міжнародным адукацыйным стандартам.
— Наш універсітэт — вялікая адукацыйная і навуковая структура, асноўная місія якой — падрыхтоўка высокакваліфікаваных, канкурэнтаздольных спецыялістаў для сістэмы аховы здароўя, а таксама выхаванне сапраўдных патрыётаў сваёй прафесіі і краіны, — адзначае рэктар БДМУ Сяргей РУБНІКОВІЧ.
У ВНУ — 96 кафедр, з іх 65 — клінічныя, дзе студэнты і маладыя ўрачы асвойваюць практычныя навыкі і праходзяць стажыроўку. Яшчэ ёсць 31 фундаментальная кафедра, дзе вывучаюцца асновы медыцыны — анатомія, гісталогія, фізіялогія і іншыя базавыя дысцыпліны. Акрамя таго, у структуру БДМУ ўваходзіць ваенна-медыцынскі інстытут, дзе рыхтуюць ваенных медыкаў, навукова-даследчы інстытут, у рамках якога дзейнічаюць лабараторыі і рэалізуюцца навуковыя праекты для практычнай медыцыны, а таксама інстытут павышэння кваліфікацыі.
Універсітэт карыстаецца значнай папулярнасцю не толькі ў Беларусі, але і за яе межамі. Аб гэтым сведчыць і той факт, што сёння ў ім навучаецца больш за дзве тысячы студэнтаў з 60 краін свету, прычым 65 % замежнікаў атрымліваюць адукацыю на англійскай мове. Па словах рэктара, летась конкурс сярод замежных абітурыентаў нават перавышаў конкурс для беларускіх, а ў сярэднім ён складаў каля трох чалавек на адно месца.
У БДМУ актыўна развіваецца сістэма прафарыентацыі. Універсітэт рэгулярна праводзіць дні адчыненых дзвярэй. Апошняе такое мерапрыемства сабрала каля 1600 чалавек разам з бацькамі.
— Для нас важна, каб у медыцынскую прафесію прыходзілі матываваныя і падрыхтаваныя маладыя людзі, таму мы працуем са школьнікамі старэйшых класаў, знаёмім іх з універсітэтам і асаблівасцямі навучання, — кажа рэктар.
Дарэчы, адна з галоўных асаблівасцяў БДМУ — сучасная практыка-арыентаваная інфраструктура. Тут размешчаны сімуляцыйныя цэнтры, абсталяваныя робататэхнікай, спецыяльнымі манекенамі і высокатэхналагічным медыцынскім абсталяваннем. Кафедры гісталогіі, біялогіі, фізіялогіі і іншыя абсталяваны лічбавымі мікраскопамі і сучаснымі сістэмамі навучання.
— Мы імкнёмся спалучаць класічную медыцынскую адукацыю з сучаснымі падыходамі: сімуляцыйным, інтэрактыўным і дыстанцыйным навучаннем. Менавіта такое спалучэнне забяспечвае высокую эфектыўнасць адукацыйнага працэсу, — упэўнены Сяргей Рубніковіч.
Адзіны дзень адчыненых дзвярэй — не проста знаёмства з установамі адукацыі, а магчымасць глыбей пагрузіцца ў сістэму навучання ў Беларусі, ацаніць яе перавагі і разнастайнасць кірункаў падрыхтоўкі. Для абітурыентаў гэта важны этап на шляху да ўсвядомленага выбару прафесіі і пабудовы паспяховай адукацыйнай траекторыі ў сваёй краіне.
Міхаіл ДАНІЛКОВІЧ
Фота Лізаветы ГОЛАД
