«І не толькі па парламенцкай лініі. Я ўпэўнена: ваш візіт у нашу краіну надасць новы імпульс нашаму супрацоўніцтву. Мы гатовы супрацоўнічаць абсалютна па ўсіх кірунках: гандлёва-эканамічным, гуманітарным, па лініі парламентаў. І ўсё, што будзе залежаць ад нас, мы для гэтага пастараемся зрабіць», — падкрэсліла Наталля Качанава.

Сярод перспектыўных Старшыня Савета Рэспублікі назвала развіццё рэгіянальных сувязяў, абмен візітамі дзелавых колаў, пастаўкі сельскагаспадарчай прадукцыі на рынкі дзвюх краін, навучанне студэнтаў з ПАР у беларускіх ВНУ, узаемадзеянне ў сферах аховы здароўя, маладзёжнай палітыкі, на ўзроўні жаночых грамадскіх аб’яднанняў.

Па выніках сустрэчы падпісаны мемарандум аб супрацоўніцтве паміж Саветам Рэспублікі Нацыянальнага сходу Рэспублікі Беларусь і Нацыянальным саветам правінцый Паўднёва-Афрыканскай Рэспублікі.

Як адзначыў у гутарцы з журналістамі старшыня Пастаяннай камісіі па міжнародных справах і нацыянальнай бяспецы Савета Рэспублікі Сяргей Алейнік, бакі дамовіліся паглыбіць адносіны. Мемарандум падпісаны ў развіццё пагаднення, якое заключана ў 2007 годзе, і прадугледжвае актыўнае ўзаемадзеянне на міжпарламенцкім узроўні, паміж профільнымі камісіямі, абмен вопытам, падрыхтоўку дарожнай карты з уключэннем у яе канкрэтных праектаў і іншае.

«Мы дамовіліся аб’яднаць намаганні заканадаўчай і выканаўчай галін улады для таго, каб вывесці двухбаковае супрацоўніцтва на якасна новы ўзровень, рэанімаваць існуючыя механізмы ўзаемадзеяння, — сказаў Сяргей Алейнік. — Удзялілі таксама асаблівую ўвагу развіццю міжрэгіянальнага супрацоўніцтва. У найбліжэйшы час намецім крокі, каб усе галіны Беларусі выйшлі на канкрэтныя праекты эканамічнага, сацыяльна-гуманітарнага супрацоўніцтва з правінцыямі ПАР».

Прадстаўнікі дэлегацыі Нацыянальнага савета правінцый Паўднёва-Афрыканскай Рэспублікі таксама наведалі Мінскі трактарны завод, дзе азнаёміліся з узорамі тэхнікі.