На базе Іванаўскага раённага цэнтра культуры і народных традыцый адбылася сустрэча Старшыні Савета Рэспублікі Наталлі КАЧАНАВАЙ са старшынямі абласных, раённых і гарадскіх Саветаў дэпутатаў. У цэнтры ўвагі ўдзельнікаў мерапрыемства былі работа са зваротамі грамадзян і дэпутатаў на месцах, асноўныя пытанні жыццезабеспячэння насельніцтва і развіццё грамадзянскіх ініцыятыў. 

Сапраўдныя вынікі 

Звяртаючыся да прысутных, Наталля Качанава падкрэсліла, што такія сустрэчы праводзяцца традыцыйна, каб абмеркаваць найбольш актуальныя тэмы, абмяняцца думкамі, падзяліцца вопытам работы дэпутацкага корпуса па ўсёй краіне. Спікер звярнула ўвагу, што такое ўзаемадзеянне вельмі важна і дазваляе выкрышталізаваць пытанні, якія найбольш актуальныя на сучасным этапе развіцця краіны. 

Для ўзаемадзеяння з дэпутатамі ўсіх узроўняў актыўна выкарыстоўваецца пляцоўка Савета па ўзаемадзеянні органаў мясцовага самакіравання пры Савеце Рэспублікі. Наталля Качанава акцэнтавала ўвагу, што такія мерапрыемствы паказваюць сапраўдныя вынікі. У прыватнасці, на адной з сустрэч было вырашана распаўсюдзіць станоўчы вопыт Гродзенскай вобласці па адкрыцці гандлёвых аб’ектаў і аб’ектаў грамадскага харчавання ў сельскай мясцовасці. МАРГ адпрацаваў гэтыя прапановы, каб яны былі распаўсюджаныя на ўсю рэспубліку. У выніку ў кожнай з абласцей павялічылася колькасць аб’ектаў, уключаных у адпаведны пералік. Не засталіся без увагі пытанні працы з прыватнымі медцэнтрамі, справядлівых цэн на паслугі таксі падчас павышанага попыту і ў непагадзь. 

«Бліжэй вас да людзей няма нікога» 

Спікер Савета Рэспублікі падкрэсліла, што дэпутаты з’яўляюцца ключавым звяном у сістэме кіравання на месцах. Яны першымі бачаць праблемы людзей, ведаюць аб іх рэальных патрэбах. «Бліжэй вас да людзей няма нікога. Вы працуеце з выканаўчай уладай у адной запрэжцы. Наша ключавая задача — работа з людзьмі, глыбокае веданне ўсяго таго, што адбываецца. Прычым кожны рэгіён адрозніваецца адзін ад аднаго», — адзначыла Наталля Качанава. Яна заклікала дэпутатаў агучваць прапановы па паляпшэнні жыцця людзей. Заканадаўчыя ініцыятывы могуць быць унесены праз Савет Рэспублікі. 

Дарэчы, за студзень — красавік 2026 года старшыні абласных, раённых, гарадскіх і сельскіх Саветаў правялі 35,5 тысячы прыёмаў грамадзян, больш за 3 тысячы прамых тэлефонных ліній, 22 тысячы сустрэч. Спікер прывяла канкрэтныя прыклады зваротаў, якія можна было б спакойна вырашыць на месцах, не пераходзячы на больш высокія ўзроўні. Яна заклікала дэпутатаў усіх узроўняў больш уважліва ўключацца ў працу са зваротамі. Што ж датычыцца той катэгорыі грамадзян, якія пакідаюць дзясяткі зваротаў, з імі варта праводзіць тлумачальную работу.  

Прыёмы павінны быць эфектыўнымі 

Спікер выказала ўпэўненасць, што такой сістэмы работы са зваротам грамадзян, якая ёсць у нашай краіне, няма больш нідзе. «Ніхто не праводзіць такой колькасці прыёмаў па асабістых пытаннях, але яны павінны быць эфектыўнымі», — падкрэсліла Наталля Качанава.  

У размове з журналістамі Наталля Качанава падкрэсліла актыўнасць дэпутацкага корпуса краіны. Спікер адзначыла важнасць правядзення такіх сустрэч з прадстаўнікамі дэпутацкага корпуса, паколькі яны дазваляюць зверыць гадзіннікі і падыходы ў працы. Старшыня Савета Рэспублікі звярнула ўвагу, што працуючы ў рэгіёнах, парламентарыі лепш разумеюць, якія праблемы хвалююць людзей, што знаходзіць сваё далейшае адлюстраванне ў рабоце над законапраектамі.  

Падчас такіх сустрэч, дадала Наталля Качанава, дэпутаты абменьваюцца практыкамі ў сваёй працы: «Сёння прагучалі дастаткова добрыя прадметныя прапановы, якія кожны можа выкарыстоўваць у сваёй працы. Гэта і замацаванне дэпутатаў за сем’ямі, якія знаходзяцца ў сацыяльна небяспечным становішчы, і развіццё турыстычнага патэнцыялу нашых рэгіёнаў, што вельмі важна і сугучна тым пытанням, якія вызначаны ў прыярытэце на пяцігодку».  

Наталля Качанава нагадала аб асноватворных задачах, якія стаяць перад дэпутацкім корпусам. «Гэта праца з людзьмі. Прэзідэнт нам выразна сказаў, дэпутацкаму корпусу ўсёй краіны, — дапамажыце, дапамажыце людзям. Ваша задача — дапамагаць людзям і працаваць з людзьмі, — прывяла словы беларускага лідара спікер. — Вось што мы робім сёння. А далей, працуючы над законапраектамі, мы выкарыстоўваем тыя напрацоўкі, якія ўбачылі на месцах». 

Данііл ХМЯЛЬНІЦКІ 

Фота БелТА
Іванаўскі раён