Старшыня Савета Рэспублікі Наталля Качанава 29 красавіка наведала ААТ «Парахонскае» ў Пінскім раёне. Яна назвала прадпрыемства прыкладам для замацавання моладзі ў сельскай мясцовасці, перадае БелТА.
«Парахонскае» выбрана невыпадкова. Гэта наш флагман, Прэзідэнт наведваў гэту гаспадарку. Тут сапраўды ёсць добрыя вынікі, людзі працуюць па-гаспадарску. Я ўбачыла, якія тут палі, які заробак, якія ўмовы створаныя для працы. Ёсць з чым параўнаць, шмат такіх гаспадарак у нас у краіне», — заўважыла Наталля Качанава. Яна акцэнтавала ўвагу на тым, што дзякуючы сельскім працаўнікам забяспечваецца харчовая бяспека ў Беларусі: на прылаўках айчынных магазінаў вялікі выбар прадуктаў, прадукты харчавання ў шырокім асартыменце пастаўляюцца на экспарт.
«Мы ганарымся сваімі прадуктамі харчавання. Гэта заслуга такіх гаспадарак. На жаль, ёсць і іншыя, дзе патрэбныя дапамога і падтрымка. Пра гэта гаварыў Прэзідэнт, калі праводзіў нараду па развіцці Віцебскай вобласці. Тут (у „Парахонскага“. — Заўв. БелТА) ёсць чаму павучыцца», — лічыць Старшыня Савета Рэспублікі.
- «Парахонскае» вызначана базавай гаспадаркай, на тэхналогіі і паказчыкі работы якой павінны арыентавацца іншыя сельскагаспадарчыя арганізацыі ў рамках рэалізацыі Праграмы развіцця раёнаў Прыпяцкага Палесся на 2025—2030 гады. Члены Прэзідыума Савета Рэспублікі азнаёміліся з вопытам работы на меліяраваных землях. У «Парахонскім» культура земляробства і ўцягванне ў севазварот зямель, што не выкарыстоўваюцца, павышэнне контурнасці палёў знаходзяцца на досыць высокім узроўні. Таксама быў прадэманстраваны заменнік зялёнага корму ў міжсезонне. Травяныя гранулы ўтрымліваюць паўнавартасны склад бялку, вітамінаў і мікраэлементаў, як і свежая зялёная маса, але захоўваюцца значна даўжэй і маюць кампактныя памеры. Падобныя тэхналогіі актуальныя для гаспадарак, у якіх кармавой базы недастаткова для паўнавартаснай нарыхтоўкі корму ў міжсезонне.
ААТ «Парахонскае» ўзначальвае Уладзімір Храленка. Наталля Качанава адзначыла яго руплівы падыход да справы, звярнуўшы ўвагу на тое, што кіраўнік гаспадаркі быў членам Савета Рэспублікі сёмага склікання. «Ён стараецца, каб у яго ўсё было сваё, каб не трэба было лішнія сродкі траціць, дапусцім, на будаўніцтва. Для гэтага ёсць звяно па будаўніцтве. Ёсць меліярацыйнае звяно. Усё вельмі хутка робіцца, не патрэбныя вялікія выдаткі на пераезды, пошук спецыялістаў. Тут усё зроблена па-гаспадарску, вельмі дакладна і разумна», — падкрэсліла спікер.
Акцэнт у сельгаспрадпрыемстве робяць на эканоміцы і кадрах. Падыходы, што прымяняюцца, прыцягваюць спецыялістаў, праблем з замацаванасцю няма. «Гэта прадпрыемства не робіць заяўкі ў навучальныя ўстановы. Чаму? Таму што маладыя людзі, якія прыязджаюць сюды на практыку, бачаць умовы і застаюцца тут працаваць. Тут няма праблем з кадрамі. Гэта ключавое», — перакананая Наталля Качанава.
Паводле яе слоў, прывабных умоў працы і добрага заробку недастаткова для замацавання моладзі. Патрэбныя ўмовы для камфортнага жыцця. «Тут будуецца жыллё, выдзяляюцца дамы для работнікаў прадпрыемства. Ну і сацыяльная сфера. Тут ёсць усё: школа мастацтваў, школа, дзіцячы сад, цырульня, швейны цэх, гандлёвы цэнтр. Створаны ўсе ўмовы, каб людзі жылі і заставаліся на вёсцы», — дадала Старшыня Савета Рэспублікі.
Наталля Качанава завастрыла ўвагу на тым, што адзін са стратэгічных напрамкаў цяперашняй пяцігодкі — моцныя рэгіёны. «Неверагодна важна зрабіць усё, каб людзі заставаліся і працавалі ў рэгіёнах, на вёсцы. Гэта самая сур’ёзная задача, пра якую гаварыў Кіраўнік дзяржавы: захаваем вёску — захаваем сваю краіну», — рэзюмавала Старшыня Савета Рэспублікі.
