«За 60 гадоў сваёй дзейнасці ПАРЛАЦІНА зарэкамендаваў сябе ў якасці сур’ёзнай парламенцкай арганізацыі. Мы ганарымся супрацоўніцтвам з вамі. Паміж нашымі парламентамі ўсталяваліся добрыя адносіны, якія мы высока цэнім. Яны дазваляюць нам супрацоўнічаць і прымаць узважаныя, вывераныя рашэнні», — адзначыла Наталля Качанава, звяртаючыся да дэлегацыі ПАРЛАЦІНА. 

Старшыня Савета Рэспублікі адзначыла, што ў Нацыянальным сходзе Беларусі дзейнічаюць пяць груп дружбы, якія ўзаемадзейнічаюць з рознымі дзяржавамі Лацінскай Амерыкі. «Мы стараемся выбудоўваць цеснае ўзаемадзеянне паміж нашымі краінамі, таму што па многіх аспектах нашы падыходы вельмі падобныя», — сказала спікер. 

Таксама Наталля Качанава звярнула ўвагу на ролю парламентарыяў у захаванні міру і ўмацаванні бяспекі праз розныя формы ўзаемадзеяння. «Мы бачым, што ў свеце адбываюцца канфлікты, баявыя дзеянні. Гэта не можа нас не турбаваць. Мы падтрымліваем рашэнне розных канфліктаў толькі праз мірнае ўрэгуляванне за сталом перагавораў. Гэта дасць магчымасць забяспечыць мір і далейшае развіццё чалавецтва. Для нас, парламентарыяў, важна ўзаемадзеянне на міжнародных пляцоўках. Напрыклад, зусім нядаўна адбылася 152-я Асамблея Міжпарламенцкага саюза, дзе нашы калегі прасоўвалі міралюбныя ініцыятывы. Мы з вялікай радасцю вітаем тое, што сёння вы з’яўляецеся назіральнікамі ў Міжпарламенцкай Асамблеі, і нашы падыходы да шматпалярнасці свету, да яго міралюбнага ўладкавання ў нас абсалютна ідэнтычныя», — падкрэсліла Старшыня Савета Рэспублікі.

• Спікер акцэнтавала ўвагу на развіцці супрацоўніцтва з краінамі ПАРЛАЦІНА па шэрагу напрамкаў. «У нас у краіне працуюць буйныя прадпрыемствы, мы выпускаем выдатную сельскагаспадарчую, аўтамабільную тэхніку. Мы, парламентарыі, таксама павінны прасоўваць гуманітарнае супрацоўніцтва, узаемадзеянне паміж нашымі маладзёжнымі, жаночымі арганізацыямі для таго, каб ведаць і разумець адзін аднаго. Мы з задавальненнем адзначаем, што за мінулы год тавараабарот паміж Беларуссю і краінамі Лацінскай Амерыкі вырас на 28%. Мы павінны і далей працаваць над тым, каб эканамічнае супрацоўніцтва паміж нашымі краінамі ўмацоўвалася. Мы гатовыя паказаць нашы сучасныя тэхналогіі, нашы вытворчасці, прадпрыемствы, навуковыя распрацоўкі», — адзначыла Наталля Качанава. 

Старшыня Савета Рэспублікі таксама падкрэсліла, што беларускія парламентарыі гатовы зрабіць усё для таго, каб супрацоўніцтва паміж Беларуссю і краінамі ПАРЛАЦІНА было ўзаемавыгадным, а ўзаемадзеянне ў розных сферах — яшчэ больш эфектыўным.

Раланда Гансалес Патрысіа падзякаваў Наталлі Качанавай за сардэчны прыём. Ён таксама выказаў падзяку за тую падтрымку, якую Беларусь аказвае Кубе ў няпросты час. Пасля сустрэчы старшыня ПАРЛАЦІНА пакінуў запіс у кнізе ганаровых гасцей Савета Рэспублікі. Таксама для дэлегацыі была арганізавана экскурсія па музеі Савета.