Удзельнікамі сустрэчы сталі прадстаўнікі трох раёнаў вобласці: Асіповіцкага, Глускага і Бабруйскага. Нарада датычылася тэм праведзенай учора з удзелам Прэзідэнта Аляксандра Лукашэнкі селектарнай нарады па пытаннях уборачнай кампаніі бягучага года. 

Як адзначыў Дзмітрый Крутой, у час селектара кіраўнік дзяржавы ўзняў шэраг важных пытанняў, у тым ліку — жалезнай дысцыпліны на месцах. Прэзідэнт увёў самы жорсткі, мабілізацыйны рэжым правядзення ўборачнай. «І задача нумар адзін бягучага года, бягучага моманту — убраць без страт той добры ўраджай, які сёння вырашчаны нашымі аграрыямі, — падкрэсліў кіраўнік Адміністрацыі Прэзідэнта. — На жаль, кантралюючымі органамі і сілавымі ведамствамі на селектары агучаны шматлікія факты абуральнай безгаспадарлівасці і бардака, якія не проста недапушчальныя, а з’яўляюцца адкрыта злачыннымі».

Сярод такіх фактаў — крадзеж запчастак, паліва, хабары, прыпіскі, негатоўнасць тэхнікі, страты збожжа, нежаданне замацаваных асоб працаваць на трактары або камбайне, негатоўнасць зернесушыльных комплексаў. 

«Ва ўмовах асаблівых капрызаў надвор’я, якія мы назіраем, патрабуецца жалезная дысцыпліна, якую даручана забяспечыць неадкладна. Учора адпаведныя мерапрыемствы ўжо былі праведзены са сваімі службамі міністрам унутраных спраў і міністрам па надзвычайных сітуацыях, — адзначыў Дзмітрый Крутой. — Сёння падчас размовы з міністрам абароны Прэзідэнт даручыў аператыўна падрыхтаваць месцы і віды работ, на якіх будуць задзейнічаны работнікі, якія праштрафіліся, несуны, п’яніцы, гультаі. У кожным раёне рэспублікі старшыня раённага выканаўчага камітэта сумесна з мясцовым ваенкамам і кіраўнікамі сельгаспрадпрыемстваў вызначаць спісы такіх работнікаў, аб якіх учора гаварылася, і яны будуць паступаць у распараджэнне Міністэрства абароны».

Дзмітрый Крутой падкрэсліў, што парушэнне дысцыпліны парушае мікраклімат у калектыве, перашкаджае правядзенню ўборачнай кампаніі. «Дзякуючы прэсе краіна павінна ведаць не толькі герояў жніва, што абсалютна справядліва, але і такіх „герояў“, якія сваім разгільдзяйствам зрываюць працэс. Калі яны праваліліся ў рамках уборачнай кампаніі, то, напэўна, у арміі змогуць прынесці карысць краіне — работы там дастаткова, у тым ліку гаспадарчай і бытавой», — зрабіў акцэнт ён. 

Гэта работа будзе арганізавана ў фармаце ваенна-выхаваўчых збораў працягласцю да двух-трох месяцаў. Незалежна ад пасад: праштрафіўся — адпраўляешся на службу. Як адзначыў кіраўнік Адміністрацыі Прэзідэнта, умовы будуць спартанскія, але з’явіцца магчымасць падцягнуць фізічную форму і карыснай працай выправіць свае памылкі на карысць арміі. 

Адказнымі за гэту работу будуць старшыня райвыканкама, ваенкам і кіраўнік гаспадаркі. Як падкрэсліў Дзмітрый Крутой, тут нельга нікога прыкрываць. «За арганізацыю ўборкі ў вобласці адказвае старшыня аблвыканкама, гэта Прэзідэнт учора дакладна абазначыў, а старшыня райвыканкама — цэнтральнае звяно на месцы. Калі не спрацуе раён, адказваць давядзецца яму», — адзначыў ён.

«Служб, якія прадстаўляюць інфармацыю ў штодзённым аператыўным рэжыме, у нас дастаткова. Таму ўсе зводкі і даведкі кожную раніцу кладуцца на стол Прэзідэнту ў разрэзе абласцей, раёнаў, а недзе і буйных арганізацый. Хаваць штосьці бескарысна», — акцэнтаваў увагу Дзмітрый Крутой.