Сапсаваная туш для павек можа прывесці да развіцця кан’юктывіту, блефарыту і нават больш сур’ёзных праблем са зрокам, расказала памочнік урача-гігіеніста аддзела грамадскага здароўя Гомельскага гарадскога цэнтра гігіены і эпідэміялогіі Вольга Касцюкова.

Тэрмін прыдатнасці тушы пазначаны на пакаванні, аднак трэба ўлічваць перыяд яе выкарыстання пасля адкрыцця. Звычайна гэта тэрмін да шасці месяцаў. Інфармацыя аб ім указана на цюбіку і пазначана літарай «М» і лічбай, якая абазначае колькасць месяцаў бяспечнага выкарыстання.

Пры куплі тушы важна пераканацца ў цэласнасці флакона, адсутнасці дэфармацый, іржы ці слядоў працякання, а ў далейшым звярнуць увагу на любое змяненне колеру, тэкстуры і паху. Калі нешта збянтэжыла, б’юці-прадуктам лепш не карыстацца.

Пратэрмінаваная касметыка небяспечная ў прынцыпе. У ёй могуць развівацца бактэрыі і грыбкі. Асабліва гэта датычыцца прадуктаў з высокім утрыманнем вады: тушы для павек, крэмаў і ласьёнаў.

Пры гэтым адкрытае пакаванне, кантакт з пальцамі і перапады тэмператур паскараюць негатыўны працэс. У выніку пасля такіх сродкаў на скуры могуць з’явіцца вугры, раздражненні і нават хімічныя апёкі.