Трэба адзначыць, што далёка не першы раз прафактыў працуе на высадцы лесу. Напрыклад, толькі восенню мінулага года ў цэлым па краіне прафсаюзы дапамаглі аднавіць больш за 75 гектараў лясных угоддзяў. Актыўна прафсаюзы ўдзельнічаюць і ў сёлетняй акцыі. Працоўныя прафсаюзныя дэсанты ў папярэднія выхадныя ўжо працавалі ў розных рэгіёнах краіны.

А сёння каля 200 прадстаўнікоў нацыянальнага прафцэнтра, галіновых прафсаюзаў аднаўлялі лясныя ўгоддзі ў Магілёўскай вобласці. Гэты рэгіён найбольш пацярпеў ад летняга ўрагану. Заходскае і Слатэнаўскае лясніцтва, дзе працавалі прадстаўнікі прафсаюзаў, таксама атрымалі сур’ёзны ўрон у выніку стыхіі. На сённяшні дзень спецыялістамі лясной гаспадаркі гэтыя тэрыторыі ўжо расчышчаны і падрыхтаваны для высадкі новых насаджэнняў.

Як падкрэсліў старшыня ФПБ Юрый Сянько, прафсаюзы, як і ўся краіна, актыўна падключылася да закліку Кіраўніка дзяржавы прыняць удзел у аднаўленні пацярпелых лясоў.

— Гэта самае малое, што сёння можна і трэба зрабіць кожнаму — фізічна папрацаваць для сваёй краіны, каб у будучыні яна была прыгажэйшай, каб унесці свой уклад для будучых пакаленняў. Тое, што мы сёння робім, дасць свае вынікі праз шмат гадоў. І вядома ўдзел у гэтай акцыі для кожнага, у тым ліку і для моладзі важны, каб разумець і ўсведамляць, якая гэта нялёгкая праца, і адчуць сябе ўдзельнікам вялікай добрай справы, — дадаў Юрый Сянько.

У выніку работы прадстаўнікоў прафсаюзаў у двух лясгасах — Магілёўскім і Чавускім — на тэрыторыі практычна ў 14 гектараў высаджана каля 50 тысяч саджанцаў. У асноўным гэта хваёвыя пароды.

Алена КРАВЕЦ.