Па словах Міхаіла Сідарука, папярэдняя рэгістрацыя ўжо завершана і заяўкі падалі больш за 2850 чалавек. «Але паколькі будзе адкрыта рэгістрацыя на старце, чакаецца 3 тыс. удзельнікаў веламарафону, — адзначыў ён. — Усяго ў нас будзе тры дыстанцыі 40, 90 і 130 км. На першую падалі заяўкі 1230 удзельнікаў. Гэта дыстанцыя, на якую дапускаюцца і падлеткі ад 14 гадоў. Дыстанцыя не паднімаецца на тэрыконы, а толькі праязджае па нізах».

Дыстанцыя 90 км была раней заяўлена, як 75 км. Яе ўдзельнікі паднімуцца на тэрыкон. А самай складанай стане 130-кіламетровая дыстанцыя, з магчымасцю падняцца на вяршыні тройчы.

Ён таксама адзначыў, што на старце будзе толькі 300 дадатковых стартавых нумароў.

Веламарафон з’яўляецца дабрачынным і ўсе сабраныя сродкі будуць перададзены ў Салігорскі раённы цэнтр карэкцыйна-развіццёвага навучання і рэабілітацыі, Петрыкаўскі раённы цэнтр карэкцыйна-развіццёвага навучання і рэабілітацыі і сацыяльна-педагагічны цэнтр Петрыкаўскага раёна. Гэтай установай будзе пералічана больш за 40 тыс. беларускіх рублёў на матэрыяльна-тэхнічнае забеспячэнне.

Начальнік аддзела інфармацыйна-ідэалагічнай работы ААТ «Беларуськалій» Ірына Пышняк адзначыла, што сёлета чакаецца 50 удзельнікаў з Расіі. «Больш за ўсё, вядома ж, веламарафоншчыкаў будзе са сталіцы — каля 1,3 тыс., — паўдзельнічаюць у марафоне каля 90 непаўналетніх. Але яны выключна з бацькамі могуць удзельнічаць у веламарафоне. Таму гэта такое свята сямейнае, дзе могуць паўдзельнічаць і дзеці, і дарослыя». 

Яна расказала, што распрацоўшчыкі маршрутаў улічвалі жаданне ўдзельнікаў убачыць бліжэй салігорскія тэрыконы, таму ўсе маршруты будуць праходзіць па тэрыторыі аднаго з нейкіх рудаўпраўленняў, а некаторыя нават па двух рудаўпраўленнях. Таксама дарога пройдзе каля вадасховішча Салігорскае.

«Гэты марафон праходзіць у рамках мерапрыемстваў, прысвечаных Дню горада і Дню Шахцёра, якія ў нас пройдуць у апошнія выхадныя жніўня. Сёлета Салігорск адсвяткуе 68 гадоў», — дадала Ірына Пышняк.

Акрамя таго, пераможцы на кожнай з дыстанцый (асобна мужчыны і жанчыны) атрымаюць прызы — грашовыя сертыфікаты. Напрыклад, пераможца на дыстанцыі 130 км выйграе 500 рублёў. «І мы, вядома ж, не можам пакрыўдзіць сваіх работнікаў „Беларуськалія“, таму ў нас залік будзе агульны і асобна для работнікаў прадпрыемства, — адзначыла Ірына Пышняк. — Таксама атрымаюць свае прызы імяніннікі, самыя ўзроставыя ўдзельнікі».

Аматарскі веламарафон «Соль Палесся» сёлета праходзіць ужо шосты раз.