Каля 600 выпускнікоў аграрных каледжаў і практыкантаў былі задзейнічаны ў гаспадарках краіны ў гарачы сезон. Пра гэта паведаміла намеснік міністра сельскай гаспадаркі і харчавання Наталля Шаўцова, адказваючы на пытанне дэпутатаў падчас сумеснага пасяджэння Палаты прадстаўнікоў і Савета Рэспублікі, паведаміла БелТА.
Парламентарыі цікавіліся, наколькі дапамаглі ў вырашэнні кадравага пытання для АПК прынятыя спачатку года змены Закона аб дарожным руху. У прыватнасці, у ліку навел — павелічэнне максімальна дапушчальнай магутнасці для некаторых сельскагаспадарчых трактароў, зніжэнне ўзроставай планкі пры атрыманні правоў на кіраванне імі. Гэта дазволіла прыцягваць на пасяўную і ўборачную кампанію навучэнцаў аграрных каледжаў.
Унесеныя змены можна назваць актуальнымі для сельскай гаспадаркі, падкрэсліла Наталля Шаўцова. «Паводле аператыўнай інфармацыі, у перыяд масавых уборачных работ было прыцягнута каля 600 выпускнікоў каледжаў і практыкантаў ва ўзросце ад 17 гадоў. Гэтыя змены вельмі важныя і значныя як з пункту гледжання кадравай падтрымкі галіны ў гэты перыяд работ, так і для атрымання навыкаў практыкантамі і выпускнікамі», — акцэнтавала яна.
У гарачую пару для аграрыяў не бываюць лішнімі працоўныя рэсурсы, асабліва па лініі механізатараў. «Таму 600 чалавек — гэта добрая падтрымка», — сказала намеснік міністра.
Сёння парламентарыі разгледзелі аспекты развіцця аграпрамысловага комплексу, павышэння яго канкурэнтаздольнасці, а таксама прыродакарыстання і экалогіі.
