«У новым навучальным годзе ў Магілёўскай вобласці ў першы клас пойдуць каля 9 тыс. дзяцей, — сказала Людміла Здорыкава. — Плануецца, што ўсяго ў нас у рэгіёне ў школы і гімназіі пойдуць амаль 109 тыс. школьнікаў».

Вучобу ўсе дзеці пачнуць у камфортных умовах. «Пашпарты гатоўнасці атрымалі ўжо 85% устаноў адукацыі вобласці. Усё ідзе ў рабочым рэжыме. Боязі, што нешта ў нас не атрымаецца, няма. Усе ўстановы 1 верасня будуць гатовыя прыняць нашых дзяцей. Цяпер ужо фінішная прамая, ідзе прыбіранне, навядзенне парадку», — расказала яна.

У новым навучальным годзе ў Магілёве адкрыюць новы будынак сярэдняй школы. «Цяперашняя сярэдняя школа № 6 атрымае сучасны і камфортны будынак, які адпавядае ўсім сучасным стандартам», — адзначыла Людміла Здорыкава.

Паводле яе слоў, попыт на профільнае навучанне ў вобласці застаецца высокім. «Зацікаўленасць навучэнцаў ёсць і ў інжынерных класах, і ў педагагічных, і ў класах прафесійнай накіраванасці. Таму гэтая работа будзе працягнутая», — падкрэсліла начальнік галоўнага ўпраўлення.

Таксама плануецца, што ў вобласці на свае першыя працоўныя месцы ў школы і ў дзіцячыя садкі прыйдуць больш за 440 маладых спецыялістаў. «Сёлета іх будзе крыху больш, чым летась», — дадала Людміла Здорыкава.