Удзел у сезоне-25/26 прынялі шэсць каманд, кожная з іх правяла ў «гладкім» чэмпіянаце па дваццаць матчаў. Першае месца ў рэгулярцы заняў самы тытулаваны клуб краіны брэсцкі «Будаўнік», які набраў 55 ачкоў з 60 магчымых. На восем балаў ад гэтай каманды адстаў ХК «Мінск», таксама ў паўфінал прайшлі ХК «Гомель» (38) і СДЮШАР ХК «Мінск»-РЦАП (21). Па-за плэй-оф засталіся каманды СДЮШАР «Будаўнік» з Брэста (9) і «Гроднааблспорт» (5).

Першую паўфінальную пару склалі «Будаўнік» і СДЮШАР ХК «Мінск-РЦАП», другую пуцёўку ў фінал аспрэчаць хакеісты «Мінска» і «Гомеля». Серыі прадоўжацца да дзвюх перамог і стартуюць на палях клубаў, якія маюць больш высокі пасеў. Паядынкі запланаваны на 28 і 30 мая, а таксама на 1 чэрвеня пры неабходнасці.

Гульні серыі за золата адбудуцца ў прамежак з 8 да 18 чэрвеня. Дзеючым чэмпіёнам Беларусі па хакеі на траве сярод мужчынскіх каманд з’яўляецца брэсцкі «Будаўнік», які ў мінулагоднім фінале абыграў «Мінск» з лікам 3:0 у пары. Бронзавыя медалі сезона-24/25 заваявалі хакеісты «Гомеля».