Кастрычнік, сапраўды, радуе нас не па сезоне цёплым надвор’ем. Як і на мінулым тыдні, калі сярэднясутачныя тэмпературы паветра апярэджвалі кліматычную норму на 1–7 °C, другі асенні месяц, заручыўшыся падтрымкай паветраных паўднёвых шырот, працягвае прыкладаць максімум намаганняў для захавання гэтага трэнду.
Тэмпературны фон па-ранейшаму адпавядае канцу верасня — пачатку кастрычніка і нават ноччу не апускаецца ніжэй за нуль. Пры гэтым, дзякуючы зрушэнням у атмасферы, не толькі замаразкі, але і туманы малаверагодны. Аднак бліжэй да выхадных заходнеатлантычныя цыклоны пачнуць псаваць надвор’е, папаўняючы скарбонку нябеснай вільгаці.
У найбліжэйшыя дні праз тэрыторыю нашай краіны пачнуць перамяшчацца атмасферныя франты з Заходняй Еўропы, якія абумовяць ападкі ў большасці раёнаў. Пры гэтым захаваецца цёплае надвор’е з начнымі мінімумамі ад 2 да 11 градусаў і дзённымі максімумамі ў межах 8–16 °C цяпла. У начныя і ранішнія гадзіны ў вільготным паветры месцамі будуць згушчацца туманы, паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя.
У пятніцу ноччу, пераважна па захадзе, раніцай і днём на большай частцы тэрыторыі краіны чакаюцца дажджы. Уначы і раніцай у асобных раёнах магчымы слабы туман. Тэмпература паветра ноччу складзе 4–11 °C цяпла, удзень — 9–16 °C з плюсам.
У суботу ноччу на большай частцы тэрыторыі, днём месцамі па краіне пройдуць кароткачасовыя дажджы. Ноччу і раніцай у асобных раёнах магчымы слабы туман. Тэмпература паветра ноччу складзе 4–11 °C вышэй за нуль, днём — плюс 8–15 °C.
У нядзелю месцамі па краіне пройдуць кароткачасовыя дажджы. Уначы і раніцай у асобных раёнах магчымы туман. Тэмпература паветра ноччу складзе 2–9 °C цяпла, удзень — 8–14 °C вышэй за нуль.
Віктар ЛЮБІМАЎ
