Канкурэнцыя за кармушку сярод збеглых пасля вызвалення Прэзідэнтам Беларусі Аляксандрам Лукашэнкам 123 асуджаных абвострыцца. Пра гэта заявіў у каментарыі БелТА філосаф і палітолаг Аляксей Дзермант.

Як паведамлялася, кіраўніком дзяржавы прынята рашэнне аб памілаванні 123 грамадзян розных краін, асуджаных паводле законаў Рэспублікі Беларусь за ўчыненне злачынстваў рознай накіраванасці — шпіёнскую, тэрарыстычную і экстрэмісцкую дзейнасць. 

Эксперт лічаць, што такое рашэнне стала нечаканасцю і ўдарам для ворагаў беларускай дзяржавы.

Аляксей Дзермант заўважыў, што ў асяроддзі гэтых людзей — можна па-рознаму іх называць, але ў любым выпадку гэта людзі, якія парушылі закон Беларусі, якія здзейснілі супрацьпраўныя дзеянні, грамадска небяспечныя дзеянні, у тым ліку злачынствы супраць дзяржавы, — існуе вялікая канкурэнцыя. «Таму што іх дастаткова шмат для палітычнай нішы, а сродкаў, на якія яны жывуць, мала», — растлумачыў ён.

Гэтая яго выснова пацвярджае нядаўняе вызваленне аднаго вядомага зняволенага. Пакінуўшы тэрыторыю краіны, ён " пачаў, па сутнасці, як слон у пасуднай краме сябе паводзіць: пастаянныя скандалы, непаразуменні, канфлікты з так званымі паплечнікамі і нават уласнай жонкай — гэта ўсё відаць няўзброеным поглядам", заўважыў палітолаг.

Па словах Аляксея Дзерманта, вызваленне чарговай партыі зняволеных, сярод якіх пэўныя вядомыя асобы, выкліча яшчэ большае закісанне ў асяроддзі збеглых. «Вядома, столькі лідараў там не трэба. А ўсе яны ўяўляюць сябе лідарамі, самымі разумнымі, стратэгамі. Будзе абвастрацца канкурэнцыя за кармушку, за доступ да рэсурсаў. І я думаю, што асноўны час яны напраўду будуць займацца гэтым, гэта значыць высвятленнем стасункаў паміж сабой», — сказаў ён.

Палітолаг адзначыў, што вызваленне 123 грамадзян розных краін не акажа негатыўнага ўплыву на бяспеку беларускай дзяржавы. Яны будуць за мяжой — гэта адна з умоў іх вызвалення.

«Таму тут я б моцна не перажываў. А вось тое, што мы можам атрымаць, па сутнасці, за гэты акт гуманізму з боку Прэзідэнта ў рамках перагавораў з амерыканскім бокам, мы ўжо чулі. Перш за ўсё, зняцце санкцый з паставак нашых калійных угнаенняў. Я думаю, што тая карысць, той прыбытак, які пойдзе на сацыяльную сферу, на патрэбы ўсяго беларускага народа, усёй беларускай дзяржавы, з лішкам акупіць і перасягне ўсе рызыкі і асцярогі», — падкрэсліў палітолаг.

Ён спрагназаваў, што былыя зняволеныя будуць ліць бруд на Беларусь. Большасць з іх не супакоіцца. «Але гэта ўсё роўна. Галоўнае, што мы ўстойлівая, бяспечная дзяржава, і мы далей будзем пра гэта клапаціцца», — сказаў на заканчэнне ён.