Канцэрт-рэквіем «Кожны трэці» з моманту свайго з’яўлення і сустрэч з на розных пляцоўках нашай краіны ўжо паспеў пакінуць след у душы ўсіх, хто на ім пабываў. Варта адзначыць, што аўтарскі калектыў праекта ў складзе мастацкага кіраўніка Маладзёжнага тэатра Уладзіславы Арцюкоўскай і паэта-песенніка Ганны Лукашэнкі сёлета адзначаны прэміяй «За духоўнае адраджэнне» за значны ўклад у захаванне гістарычнай памяці, умацаванне духоўных каштоўнасцяў беларускага народа. Але з атрыманнем прызнання на высокім дзяржаўным узроўні сцэнічнае жыццё праекта не спыняецца. Прынята рашэнне аб паказе канцэрта-рэквіема «Кожны трэці» ў некаторых буйных гарадах і рэгіёнах Расійскай Федэрацыі.
— Ужо вызначаны даты канцэртаў у Казані і Санкт-Пецярбургу. Пра іншыя гарады пакуль рана гаварыць, але будзем рады, калі атрымаецца паказаць наш праект і ў іншых рэгіёнах Расіі. Таму што гэта нашы агульныя боль і памяць, пра якія трэба распавядаць, асабліва сёння, калі праўды ў нашым свеце засталося зусім няшмат, — адзначае генеральны прадзюсар праекта «Кожны трэці» Ганна ЛУКАШЭНКА. — Канцэрт-рэквіем «Кожны трэці» заўсёды адаптуецца пад пляцоўку, дзе мы яго паказваем. Крыху змяняецца сцэнаграфія, дапаўняюцца дэкарацыі. Абавязкова ўдакладняецца і абнаўляецца статыстычная інфармацыя, таму што расследаванне Генеральнай пракуратуры па факце генацыду насельніцтва Беларусі ў гады Вялікай Айчыннай і ў пасляваенны перыяд працягваецца, і мы перад кожным паказам актуалізуем гэтыя даныя.
Праект быў створаны ААТ «Музычная медыякампанія» ў 2024 годзе пры садзейнічанні Міністэрства культуры Рэспублікі Беларусь, Міністэрства абароны Рэспублікі Беларусь і Генеральнай пракуратуры Рэспублікі Беларусь. Ён прысвечаны захаванню гістарычнай памяці пра Вялікую Айчынную вайну з удзелам вядучых артыстаў і творчых калектываў нашай краіны. Ужо адбылося больш за дзесяць паказаў канцэрта-рэквіема «Кожны трэці» як на галоўных пляцоўках Беларусі, так і ў Вялікай зале Дзяржаўнага Крамлёўскага палаца ў Маскве. Створаны тэлеверсіі праекта, што паспрыяла таму, каб яго важныя пасылы пачула і ацаніла шматлікая тэлевізійная аўдыторыя. І з улікам сацыяльнай значнасці праекта цяпер прынята рашэнне, што ўбачыць яго сёлета змогуць яшчэ ў некаторых расійскіх рэгіёнах. Так, напярэдадні 81-й гадавіны Перамогі ў Вялікай Айчыннай вайне плануюцца паказы 28 і 29 красавіка ў Казані.
А 8 і 9 верасня — у Дзень памяці ахвяр блакады Ленінграда (у 85-ю гадавіну пачатку Блакады Ленінграда) — «Кожны трэці» чакае сустрэч з гледачамі ў Санкт-Пецярбургу.
— Калі я пачынала працаваць над стварэннем канцэрта-рэквіема «Кожны трэці», то найперш імкнулася зразумець, якімі будуць героі на сцэне. Я зрабіла паэму Анатоля Вярцінскага п’есай і знайшла герояў, якія распавялі гэтую гісторыю, а таксама адшукала героя-сучасніка (бо і сябе з ім атаясамлівала), якому хочацца распавесці не толькі гісторыю нашай краіны, але і сваёй сям’і. Бо ў маёй сям’і былі вялікія дзяды, якія прайшлі вайну, і бабулі, якія былі ў канцлагеры, таму для мяне асабіста ўвесь праект з’яўляецца не толькі гісторыяй болю Беларусі, але і гісторыяй маёй сям’і, — падзялілася рэжысёр, мастацкі кіраўнік Маладзёжнага тэатра Уладзіслава АРЦЮКОЎСКАЯ. — Сёння ўсе мы пражываем складаны час. І асабліва складаны ён для маладога пакалення. Таму што цяпер кожны мае магчымасць у сваім тэлефоне паглядзець самыя розныя перадачы, фільмы, якія ўтрымліваюць як праўду, так і хлусню. Шмат уліваецца непатрэбнай інфармацыі, на якой выхоўваецца моладзь. А маладым людзям складана часам разабрацца ва ўсім гэтым. Але гэта неабходна рабіць, таму што калі мы не разбяромся ў праўдзе мінулага і ў гісторыі, у тым, што адбывалася з нашымі прадзедамі, то пазбавім сябе будучыні. Таму вельмі важна ствараць такія праекты, каб даваць моладзі нагоду для дыялогаў і разважанняў, каб не паўтарыліся памылкі мінулага і каб заўсёды было мірным жыццё на нашай планеце.
Алена ДРАПКО.
Фота дадзены «Музычнай медыякампаніяй».
