Беларускі народ заплаціў страшную цану за Вялікую Перамогу, заявіў журналістам намеснік прэм’ер-міністра Уладзімір Каранік перад урачыстым зборам і канцэртам майстроў мастацтваў, прысвечанымі 80-й гадавіне Перамогі савецкага народа ў Вялікай Айчыннай вайне, у Палацы Рэспублікі, перадае БелТА.

«Трагедыя беларускага народа — гэта загінулы кожны трэці. І заўсёды Дзень Перамогі для нас — гэта найвялікшае свята, але, як правільна спяваецца ў песні, гэта радасць са слязамі на вачах. З аднаго боку, мы радуемся, што пакаленне пераможцаў змагло зламаць хрыбет фашызму і абараніць права беларускага народа жыць на сваёй зямлі. З іншага боку, мы разумеем, што беларускі народ заплаціў страшную цану, і мы смуткуем як па тых, хто загінуў на палях бітваў, так і па мірных жыхарах, якія былі па-зверску знішчаны акупантамі», — адзначыў Уладзімір Каранік.

Дзень Перамогі — гэта аснова нашай дзяржаўнасці, падкрэсліў віцэ-прэм’ер. «Таму што не было б гэтага свята, не было б і сучаснай, такой любімай намі Беларусі», — дапоўніў ён.