— Штогод кіраўнік дзяржавы ўскладае на дзяржкамісію важную задачу па кантролі за выкананнем заканадаўства пры падрыхтоўцы да правядзення ўступнай кампаніі, накіраваную на абарону правоў і законных інтарэсаў грамадзян, — нагадаў профільны віцэ-прэм’ер.

Ён адзначыў, што на дадзены момант усе рабочыя органы дзяржкамісіі створаны, камісіі сфарміраваны і за членамі камісіі, за выключэннем старшыні абласной камісіі, ужо замацаваны канкрэтныя ўстановы адукацыі.

— Ваша першачарговая задача — арганізаваць аператыўны і бягучы кантроль за ходам уступнай кампаніі на ўсіх яе этапах пры правядзенні цэнтралізаванага экзамену і цэнтралізаванага тэсціравання. Гэта работа пачынаецца ўжо на наступным тыдні, — акцэнтаваў увагу Уладзімір Каранік.

Віцэ-прэм’ер нагадаў, што прыём і залічэнне абітурыентаў у рамках мэтавай падрыхтоўкі пачынаюцца з 27 чэрвеня, залічэнне абітурыентаў у асноўны набор устаноў вышэйшай адукацыі — з 12 ліпеня, ва ўстановы сярэдняй спецыяльнай адукацыі — з 18 ліпеня.

Уладзімір Каранік таксама акцэнтаваў увагу членаў камісіі на некаторых аспектах.

Па-першае, гэта дзейсны кантроль за правядзеннем і цэнтралізаванага экзамену, і цэнтралізаванага тэсціравання. Ён падкрэсліў, што гэта датычыцца дастаўкі, захоўвання, забеспячэння сакрэтнасці тэставых матэрыялаў, а таксама рэжыму пропуску і ідэнтыфікацыі асобы ўдзельнікаў.

— Асноўная задача камісіі — забяспечыць роўныя ўмовы ўсім нашым маладым людзям для дэманстрацыі свайго ўзроўню падрыхтоўкі і ведаў, — падкрэсліў ён.

Як і летась, цэнтралізаваны экзамен і цэнтралізаванае тэсціраванне будуць праходзіць у адзіныя тэрміны для ўсіх выпускнікоў. Цэнтралізаваны экзамен пройдзе ў 

144 пунктах, а цэнтралізаванае тэсціраванне — у 40 пунктах у асноўныя дні і ў 6 пунктах у дадатковыя дні.

— Задача — забяспечыць максімальна камфортныя і бяспечныя ўмовы ва ўсіх названых пунктах. Як мяне ўжо праінфармавалі, усе неабходныя ўмовы для правядзення цэнтралізаванага экзамену і цэнтралізаванага тэсціравання створаны. Гэта неаднаразова правяралася камісіямі. Заўвагі, якія былі выяўлены па выніках рэпетыцыйнага тэсціравання, своечасова ліквідаваны, — дадаў профільны віцэ-прэм’ер.

Тым не менш Уладзімір Каранік лічыць неабходным правесці дадатковы комплекс мерапрыемстваў па інфармаванні грамадскасці праз сродкі масавай інфармацыі па пытаннях арганізацыі цэнтралізаваных зон і цэнтралізаванага тэсціравання, асабліва аб пераліку забароненых дзеянняў. Гэта работа замацаваная за Мінадукацыяй сумесна з Мінінфармам.

Варта сказаць, што падыходы да правядзення ўступных выпрабаванняў не памяняліся. Новаўвядзеннем стала толькі тое, што цяпер электроннымі сродкамі ўдзельнікам цэнтралізаванага тэсціравання забаронена карыстацца не толькі непасрэдна ў месцы правядзення тэсціравання, але і фактычна ва ўсіх памяшканнях установы, дзе яно праводзіцца.

— Мы павінны забяспечыць праверку ведаў, а не тэхнічнай аснашчанасці нашых абітурыентаў. Важна, каб не было ніякіх эксцэсаў, звязаных з тым, што хтосьці забыўся зняць «разумны» гадзіннік, хтосьці забыўся выкласці дадатковы тэлефон. Трэба наладзіць інфармацыйную работу, каб усе былі дапушчаны да экзаменацыйных мерапрыемстваў і каб мы нікога ў працэсе ЦЭ і ЦТ не выдалялі з аўдыторый за парушэнне дзеючых правіл, — рэзюмаваў Уладзімір Каранік.