«Першы этап — адаптацыя дацкіх чырвоных кароў для выкарыстання ў сферы АПК Рэспублікі Беларусь, вызначэнне іх генетычнага патэнцыялу, тэхналогіі ўтрымання, каб забяспечыць і захаванасць гэтых унікальных жывёл, і высокую прадукцыйнасць. Можна сказаць, першы этап ужо завершаны», — расказаў Уладзімір Каранік.

Селекцыйная работа вядзецца ў некалькіх гаспадарках, уключаючы эксперыментальную базу «Вусце» НАН Беларусі ў Аршанскім раёне. «Дацкая парода ўжо выкарыстоўваецца не толькі ў „Вусці“. Ёсць участкі, сумесна створаныя і ў Мінскай, і ў Брэсцкай, і ў Гродзенскай абласцях», — адзначыў старшыня Прэзідыума НАН Беларусі.

Наступны этап — дакладнае вывядзенне генетычных маркераў высокай прадукцыйнасці і высокай захаванасці жывёл, а затым вывядзенне ўжо сваёй пароды. «Гэта скрыжаванне з беларускімі пародамі і з іншымі, той жа галштынскай, каб стварыць свой племянны напрамак, які забяспечыць патрэбнасці нашай сельскай гаспадаркі», — дадаў Уладзімір Каранік, падкрэсліўшы, што каровы дэманструюць высокую прадукцыйнасць. Тэхналогія іх утрымання адпрацавана.

Як паведамлялася, праект па вывядзенні пароды стартаваў некалькі гадоў таму. Мэта — стварэнне ўласнай высокапрадукцыйнай чырвонай пароды кароў да 2030 года, якая стане альтэрнатывай і дадаткам да галштынскай і чорна-пярэстай парод. Атрыманае малако характарызуецца павышанай колькасцю тлушчу, бялку і вітамінаў, што ідэальна падыходзіць для вытворчасці сыроў.