«Рады вітаць вас у сценах Цэнтральнай выбарчай камісіі Рэспублікі Беларусь. Наша з вамі сустрэча праходзіць напярэдадні дзяржаўнага свята — Дня Канстытуцыі Рэспублікі Беларусь, які адзначаецца ў нас у краіне 15 сакавіка. Тады, у 1994 годзе была прынятая Канстытуцыя суверэннай Рэспублікі Беларусь. Асноўны Закон нашай краіны, прадвызначыў яе развіццё як унітарнай дэмакратычнай сацыяльнай прававой дзяржавы. Гэтае свята значнае яшчэ і таму, што Канстытуцыяй упершыню ў гісторыі Беларусі быў уведзены інстытут прэзідэнцтва. У гэтым жа годзе адбыліся першыя выбары кіраўніка дзяржавы», — сказаў Ігар Карпенка.

Да Дня Канстытуцыі па ўсёй краіне праводзіцца акцыя «Мы — грамадзяне Беларусі!», падчас якой уручаюцца пашпарты юным беларусам. «Такая акцыя, прымеркаваная да дзяржаўнага свята, не выпадковая. Канстытуцыя Рэспублікі Беларусь — гэта аснова дзяржавы, якая забяспечвае стабільнасць, бяспеку і паступальнае развіццё грамадства. Не адно пакаленне беларусаў унесла свой уклад у станаўленне і развіццё падмурка беларускай дзяржаўнасці. Сёння адказнасць за крэпасць гэтага падмурка ляжыць на вашых плячах — новым пакаленні роднай Беларусі. Вам, сапраўдным грамадзянам і патрыётам сваёй краіны, трэба будзе развіваць лепшыя традыцыі нашых продкаў, умацоўваць нашу дзяржаўнасць, уносіць свой пасільны ўклад у забеспячэнне суверэнітэту і незалежнасці Рэспублікі Беларусь», — адзначыў кіраўнік ЦВК.

«Пашпарт грамадзяніна Рэспублікі Беларусь з’яўляецца дакументам, які пацвярджае ваша грамадзянства, ён звязвае вас з нашай Айчынай, з беларускім народам, яго культурай, мовай, традыцыямі. Уручэнне пашпартоў сімвалізуе ваша сталенне і станаўленне як годных прадстаўнікоў беларускага грамадства, — падкрэсліў Ігар Карпенка. — Віншую вас, дарагія сябры, з Днём Канстытуцыі! Жадаю поспехаў у сацыяльна значных пачынаннях на карысць беларускага народа, моцнага здароўя, міру і дабрабыту!».

Галоўнымі героямі ўрачыстасці сталі 14-гадовыя юнакі і дзяўчаты — прадстаўнікі ўсіх абласцей і горада Мінска. У падарунак яны традыцыйна атрымалі дзяржаўны сцяг і Канстытуцыю Рэспублікі Беларусь, а таксама вокладку на пашпарт і кніжнае выданне «Сімвалы суверэннай Беларусі».

Патрыятычная ініцыятыва была прапанаваная БРСМ у 2004 годзе. За гэтыя гады яна набыла шырокую папулярнасць сярод моладзі і па праве лічыцца адной з важных традыцый нашай краіны. Урачыстае ўручэнне нацыянальных пашпартоў падлеткам падкрэслівае іх пераход у дарослае жыццё, дазваляе яшчэ лепш усвядоміць, што цяпер яны сталі паўнапраўнымі грамадзянамі Беларусі, адказнымі перад ёй і яе законамі.

Дзень Канстытуцыі Беларусі штогод адзначаецца 15 сакавіка як дзяржаўнае свята. Асноўны закон вызначае асновы дзяржаўнай улады і грамадскага жыцця, гарантуе асноўныя правы і свабоды грамадзян, вызначае асновы дэмакратычнай сацыяльнай прававой дзяржавы, а таксама з’яўляецца важным фактарам для фарміравання грамадзянскай ідэнтычнасці і нацыянальнай самабытнасці беларусаў.

Фота БелТА