Як паведамілі даследчыкі, новы гель імітуе прыродныя працэсы, дзякуючы якім у немаўлят фарміруецца зубная эмаль. Ён дзейнічае як свайго роду «каркас» для іонаў кальцыю і фасфату, якія знаходзяцца ў сліне, што спрыяе натуральнаму аднаўленню эмалі. Пры гэтым у прыродзе такі працэс немагчымы пасля пашкоджання.

Распрацоўка была праведзена спецыялістамі фармацэўтычнага факультэта і кафедры хімічнай і экалагічнай інжынерыі Нотынгемскага ўніверсітэта пры падтрымцы калег з іншых краін. Поўная справаздача аб выніках даследавання апублікаваная ў навуковым часопісе Nature Communications.

Па даных Сусветнай арганізацыі аховы здароўя, каля 3,7 мільярда чалавек па ўсім свеце пакутуюць ад захворванняў поласці рота. Разбурэнне зубной эмалі з’яўляецца адной з асноўных прычын інфекцый, павышанай адчувальнасці зубоў і іх страты. Гэтыя праблемы таксама могуць быць звязаныя з больш сур’ёзнымі захворваннямі, такімі як дыябет і сардэчна-сасудзістыя паталогіі.

Кіраўнік даследавання, прафесар біямедыцынскай інжынерыі і біяматэрыялаў Альвара Мата, адзначыў, што новы гель «можна лёгка і хутка прымяняць» і ён «распрацаваны з улікам патрэб урача і пацыента». Навукоўцы спадзяюцца, што першы падобнага роду прадукт будзе гатовы да запуску ўжо ў наступным годзе і прынясе значную карысць людзям па ўсім свеце.

Пол Хатан, прафесар Шэфілдскага ўніверсітэта і член камітэта па ахове здароўя і навуцы Брытанскай стаматалагічнай асацыяцыі, адзначыў, што дадзеная работа ўяўляе сабой важны этап у стаматалогіі, які здольны радыкальна змяніць падыход да лячэння захворванняў зубоў:

«Узнаўленне натуральнай эмалі для аднаўлення зубоў на працягу многіх гадоў было свайго роду „Святым Граалем“ для навукоўцаў, якія займаюцца стаматалагічнымі матэрыяламі, і гэты артыкул сведчыць аб тым, што быў дасягнуты ўражальны прарыў».