Яўген Каваленка адзначыў, што краіны СНД ужо 35 гадоў нястомна падтрымліваюць адна адну і дапамагаюць выстаяць у няпростых геапалітычных умовах. «За гэтыя гады ў рэгіёне ствараліся іншыя геапалітычныя аб’яднанні, міжнародныя арганізацыі, змяняўся склад іх удзельнікаў. Але Садружнасць Незалежных Дзяржаў з першых гадоў свайго заснавання і ўвесь гэты перыяд часу з’яўляецца тым базісам, які ўтрымаў нашы краіны разам, не даў страціць сувязі паміж народамі, сумесныя перамогі і дасягненні. Сёння СНД — гэта пляцоўка, якая забяспечвае гібкі механізм арганізацыі міждзяржаўнага дыялогу. Менавіта такі фармат дае магчымасць улічваць нацыянальныя асаблівасці і прадастаўляць магчымасць кожнай з дзяржаў уключацца ў інтэграцыйныя працэсы ў той меры і па тых напрамках, якія адпавядаюць іх нацыянальным інтарэсам. Выбудоўванне і пашырэнне пазіцый кожнай дзяржавы на сусветнай арэне ажыццяўляецца так, каб найбольш эфектыўна абараняць суверэнітэт, а таксама ствараць спрыяльныя ўмовы для сацыяльна-эканамічнага развіцця», — дадаў ён.

«Плённая інтэграцыя на прасторы СНД з’яўляецца адным з прыярытэтных вектараў знешняй палітыкі Беларусі. Наша краіна выступае за актыўнае выкарыстанне фармату гэтага інтэграцыйнага ўтварэння. Пры гэтым мы не спыняемся на дасягнутым і імкнёмся ўдасканаліць адпаведныя ўзаемаадносіны. Менавіта Садружнасць з’яўляецца пляцоўкай для шматбаковага дыялогу дзяржаў і рэгіёнаў у прававой сферы, — падкрэсліў Яўген Каваленка. — Асновай для практычнай сумеснай работы выступаюць Мінская і Кішынёўская канвенцыі аб прававой дапамозе па грамадзянскіх, сямейных і крымінальных справах. У мінулым годзе нашымі прававымі ведамствамі праведзена работа па заключэнні пратаколаў аб унясенні змяненняў у названыя шматбаковыя дагаворы. Папраўкі да Канвенцый накіраваны на ўстараненне праблем у частцы прызнання і выканання судовых загадаў. Акрамя таго, у 2025 годзе дзяржавамі — удзельніцамі СНД падпісана пагадненне аб супрацоўніцтве па абмене інфармацыяй пры ажыццяўленні прымусовага выканання судовых актаў».



Галоўнай пляцоўкай для абмеркавання пытанняў развіцця сістэмы юстыцыі, пабудовы сумесных планаў выступае Савет Міністраў юстыцыі дзяржаў — удзельніц СНД. У 2025 годзе беларускі бок старшынстваваў у гэтым калегіяльным утварэнні. «Было выканана больш за 20 розных мерапрыемстваў. У цэлым станоўчай тэндэнцыяй апошніх гадоў работы Савета бачыцца падрыхтоўка канкрэтных прапаноў і ініцыятыў. У тым ліку гэта і ініцыятывы па стварэнні базавых арганізацый у сферы юстыцыі. Такі статус нададзены Беларускай натарыяльнай палаце і Федэральнай палаце адвакатаў Расіі. Названыя арганізацыі ажыццяўляюць вялікі пласт работы па абмене інфармацыяй аб правапрымяняльнай практыцы і ўдасканаленні механізмаў аказання юрыдычнай дапамогі, — сказаў міністр юстыцыі. — Яшчэ адна беларуская ініцыятыва, увасобленая ў жыццё, гэта правядзенне ў СНД Года прававой асветы ў 2027 годзе. Такое рашэнне падтрымана Саветам кіраўнікоў дзяржаў і цяпер мы знаходзімся на завяршальным этапе работы па фарміраванні адпаведнага плана мерапрыемстваў, які ўключае ўжо каля 100 пазіцый. Адным з прыярытэтных далейшых напрамкаў дзейнасці з’яўляецца пытанне лічбавізацыі, стварэнне адзінай электроннай сістэмы абмену інфармацыяй паміж міністэрствамі юстыцыі дзяржаў — удзельніц СНД». 

«Пляцоўка СНД — гэта ўнікальны фармат супрацоўніцтва дзяржаў на постсавецкай прасторы і, напэўна, адно з інтэграцыйных фарміраванняў, якое забяспечвае нам магчымасць найбольш цеснага супрацоўніцтва ў прававой сферы. Беларускім бокам рэалізаваны шэраг ініцыятыў у сферы юстыцыі, у прыватнасці, Беларуская натарыяльная палата надзелена статусам базавай арганізацыі ў рамках СНД. Яна займаецца актыўнай перадачай свайго вопыту, звязанага з аказаннем натарыяльных паслуг насельніцтву. Само Міністэрства юстыцыі ўваходзіць у склад Савета Міністраў юстыцыі дзяржаў — удзельніц СНД. У мінулым годзе мы былі старшынямі, і за гэты час была рэалізавана значная колькасць мерапрыемстваў у гэтай сферы», — адзначыў Яўген Каваленка.