Футбалісты казахстанскага «Кайрата» на мінулым тыдні ў Алматы выйгралі ў Браціслаўскага «Слована» з мінімальнай перавагай — 1:0, асноўны і дадатковы час сустрэчы ў славацкай сталіцы завяршыўся з такім жа вынікам на карысць «Слована», і толькі ў серыі пасляматчавых пенальці чэмпіёны Казахстана змаглі адолець сапернікаў — 4:3. Капітан казахстанскага клуба беларускі абаронца Аляксандр Мартыновіч рэалізаваў свой пенальці, а вось хаўбек Валерый Грамыка не змог перайграць галкіпера славакаў. У барацьбе за выхад у асноўны этап галоўнага кантынентальнага турніру «Кайрат» будзе сапернічаць з шатландскім «Сэлтыкам» з Глазга.

У плэй-оф таксама прабіўся «Карабах» з Агдама, які двойчы перайграў паўночнамакедонскую «Шкендыю» — 1:0 і 5:1, наступным сапернікам чэмпіёнаў Азербайджана будзе венгерскі «Ферэнцварош» з Будапешта. Кіеўскае «Дынама» пацярпела два паражэнні ад кіпрскага «Пафаса», якому трэба будзе згуляць з сербскай «Црвенай зоркай» з Бялграда. Склады астатніх пар плэй-оф: «Базель» (Швейцарыя) — «Капенгаген» (Данія), «Фенербахчэ» (Стамбул, Турцыя) - «Бенфіка» (Лісабон, Партугалія), «Будэ-Глімт» (Нарвегія) — «Штурм» (Грац, Аўстрыя), «Глазга Рэйнджэрс» (Шатландыя) — «Бруге» (Бельгія). Матчы пройдуць 19-27 жніўня.

Адзіны беларускі прадстаўнік, які застаўся ў еўракубках, гродзенскі «Нёман» заўтра ў венгерскім Сегедзе правядзе намінальна дамашні матч трэцяга раўнда кваліфікацыі Лігі канферэнцый з фарэрскім «Клаксвікам». У першай гульні ў Торсхаўне чэмпіёны Фарэрскіх астравоў выйгралі з вынікам 2: 0. Пераможца гэтай пары ў барацьбе за трапленне ў асноўны этап сустрэнецца з іспанскім «Райо Вальекана» з Мадрыда. Раней свае выступленні ў кантынентальных турнірах завяршылі футбалісты мінскага "Дынама", жодзінскага «Тарпеда-БелАЗа» і брэсцкага «Дынама».