18 кастрычніка «зубры» прымалі казанскі «Ак Барс», які ў мінулым сезоне выбіў мінчан з плэй-оф Кубка Гагарына. Супраць «Дынама» згуляў былы капітан сталічнага клуба Андрэй Стась. Ужо на пятай мінуце гаспадары выйшлі наперад дзякуючы голу Ільі Усава ў большасці, гэта шайба стала для форварда першай у сезоне.

Больш у гэтым матчы падапечныя Сяргея Брыліна не закідвалі. Казанцы ж яшчэ да адыходу на перапынак захапілі лідарства, у сярэдзіне другога перыяду павялічылі перавагу, а незадоўга да фінальнай сірэны паставілі кропку. У выніку паражэнне «Дынама» з лікам 1:4, «зубры» не набралі ачкі ў абедзвюх гульнях тыдня на родным лёдзе.

Пасля першай чвэрці рэгулярнага чэмпіянату сталічны клуб з 17 баламі займае сёмае месца ў табліцы Заходняй канферэнцыі. Далей нашу каманду чакае двухматчавае гасцявое турнэ: 22 кастрычніка мінчане згуляюць супраць «Сочы», а 24 кастрычніка сустрэнуцца з «Тарпеда» ў Ніжнім Ноўгарадзе.