Новы гульнявы тыдзень падапечныя Дзмітрыя Квартальнава адкрыюць матчам з маскоўскім ЦСКА. У бягучай дамашняй серыі «зубры» атрымалі тры перамогі ў трох матчах з агульным лікам 16:5. На гэты момант мінчане займаюць чацвёртае месца ў Заходняй канферэнцыі, апярэджваючы «армейцаў», якія ідуць восьмымі, на пяць ачкоў. Хакеісты ЦСКА на стыку кастрычніка і лістапада згулялі маскоўскія дэрбі з «Дынама» і «Спартаком» і ў абодвух матчах уступілі з лікам 2:3.

Папярэдняя сустрэча каманд са сталіц Беларусі і Расіі адбылася роўна два тыдні таму на «ЦСКА Арэне», тады мацнейшымі былі «чырвона-сінія» (5:3). У мінулым сезоне «армейцы» аказаліся для «Дынама» знакавым сапернікам — перамога над масквічамі ў серыі плэй-оф стала для «зуброў» першай за ўвесь час удзелу ў Кубку Гагарына. Чарговае процістаянне сталічных клубаў стартуе на «Мінск-Арэне» ў 19:10.