Хакеісты «Нёмана» прымалі другую каманду чэмпіянату «Дынама-Маладзечна». Стартавая траціна скончылася ўнічыю 1: 1, у другім перыядзе гледачы таксама ўбачылі два галы, але абодва за аўтарствам гаспадароў. У заключнай 20-хвілінцы гродзенцы зноў паразілі чужыя вароты двойчы, сапернік абмежаваўся адным дакладным кідком. Вынік гульні - 5:2, дзве шайбы за «Нёман» закінуў Герман Паддубны. Для клуба з Гродна гэтая вікторыя стала толькі другой у сямі апошніх матчах, дынамаўцы ж перапынілі серыю з трох перамог.

Паралельна на поўдні краіны адбыўся паядынак «Гомеля» і «Віцебска». У першым перыядзе госці адарваліся на два галы, а ў наступным гульнявым адрэзку давялі разрыў у ліку да буйнога. Незадоўга да сірэны «Рысі» злёгку скарацілі адставанне, у выніку 4:2 на карысць паўночнікаў. Віцебскі клуб дамогся перамогі ўпершыню за чатыры матчы, для гамяльчан суботняя параза стала ўжо шостай запар. Гульнявую праграму 29 лістапада завершыць сустрэча «Брэста» і «Металурга».