Зусім хутка хакейны сезон 2024/2025 будзе афіцыйна закрыты на традыцыйнай цырымоніі. Сёлета Федэрацыя хакея Беларусі падводзіць вынікі не ў справаздачах, а на прыгожым свяце ўжо ў пяты раз.
Падзея не толькі прыгожая, але і вельмі значная — не так часта ўся беларуская хакейная сям’я збіраецца разам. І разам радуецца за пераможцаў у разнастайных намінацыях. Кожны хакейны сезон — асаблівы, кожны сезон адкрывае новыя імёны і дазваляе яшчэ раз захапіцца ўжо знаёмымі героямі. З нагоды гэтай юбілейнай даты прапануем панастальгіраваць па мінулых хакейных сезонах і ўспомніць, хто асабліва адзначаўся.
З 2021 года на цырымоніі закрыцця сезону ўручаецца прыз імя Руслана Салея. Тры разы запар статуэтку забіраў капітан «Юнацтва» Андрэй Антонаў. У 2024 годзе ён афіцыйна скончыў спартыўную кар’еру. Таму месца прэтэндэнта на ўладальніка прыза Руслана Салея сёлета вакантнае. На цырымоніі 2021 года сапраўднай зоркай быў Герман Несцераў. Ён быў прызнаны найлепшым хакеістам па меркаванні саміх хакеістаў, што ўжо вельмі ганарова. Таксама ён атрымаў статуэтку самага каштоўнага гульца плэй-оф і выйграў званне лепшага форварда сезону. Выдатна ён правёў і сезон 2024/2025. У складзе мінскага «Юнацтва» Герман Несцераў заваяваў Кубак Прэзідэнта — упершыню ў сваёй кар’еры. Ёсць задзел на намінацыі. На той цырымоніі ўсім запомніўся і выхад Арцёма Дзямкова, які прыехаў на мерапрыемства на роліках. І самае галоўнае — у шлеме.
У 2022 годзе рэкорд па колькасці перамог у розных намінацыях пабіў лідар жлобінскага «Металурга» Аляксей Міхноў. Ён быў прызнаны найлепшым хакеістам, лепшым нападаючым і лепшым бамбардзірам, а яшчэ заваяваў прыз як самы выніковы гулец рэгулярнага чэмпіянату. Гэта зараз Віталь Пінчук вядомы ўсім як зорка «Дынама-Мінск». А ў сезоне 2021/2022 ён толькі заявіў аб сабе як лепшы малады гулец, за што і атрымаў адпаведны прыз. І знакі пра тое, што яго імя будзе скандзіраваць 15-тысячная «Мінск-арэна» былі ўжо тады — у 2022 годзе Віталь Пінчук перамог у намінацыі «Лепшы гол».
Той сезон быў вельмі важным для беларускага хакея. І гаворка не толькі пра гульні. На Алімпійскіх гульнях упершыню працаваў беларускі суддзя. Максім Сідарэнка абслугоўваў матч мужчынскіх зборных Расіі і Швейцарыі. Яго запіс у старонку летапісу айчыннага хакея ацанілі і прызналі Максіма Сідарэнку лепшым арбітрам. І не аспрэчыш.
Сезон 2022/2023 надоўга запомніцца аматарам гродзенскага «Нёмана». Гэта было выдатнае паляванне за трафеем. І няхай гродзенскія хакеісты яго не заваявалі, біліся яны за яго неверагодна. Усё пачалося яшчэ ў паўфінале. Падчас серыі «Нёман» уступаў мінскаму «Юнацтву» — 0:3. Але здолеў спачатку адыграцца, а потым у сёмым вырашальным матчы вырваў пуцёўку ў фінал. Раней гэта не ўдавалася нікому. У фінале адчайных гродзенскіх хлопцаў чакалі суровыя жлобінскія супернікі. І няхай сезон «Нёман» скончыў з сярэбранымі медалямі, ён запомніцца надоўга. А кіраваў гродзенскім клубам на гэтым шляху Яўген Летаў. Уражання дадае той факт, што гэта быў яго першы сезон у экстраліге. Таму сумневаў у тым, каму ўручыць кубак імя Уладзіміра Навумава — узнагароду найлепшаму трэнеру — і быць не магло. Аднак па выніках сезону спецыяліст пакінуў «Нёман».
На цырымоніі ў 2024 годзе быў пабіты рэкорд па колькасці ўзнагарод за вечар. Форвард «Шахцёра» Міхаіл Шалагін сабраў 5 статуэтак. Ён быў адзначаны як лепшы снайпер, лепшы бамбардзір і самы карысны гулец рэгуляркі, лепшы форвард сезона і лепшы гулец сезона на думку хакеістаў Betera-Экстралігі.
Кубак імя Уладзіміра Навумава, які ўручаецца найлепшаму трэнеру сезону, атрымаў Дзмітрый Краўчанка. У сезоне 2023/2024 ён трэці раз запар прывёў жлобінскі «Металург» да чэмпіёнства. Дарэчы, у гэтым сезоне эпоха Дзмітрыя Краўчанкі ў «Металургу» скончылася — трэнер развітаўся са жлобінскім клубам і адправіўся пакараць новыя вышыні.
Так, за некалькі гадзін цырымоніі закрыцця сезону хакеісты, трэнеры, кіраўнікі, аматары могуць перажыць увесь сезон, які кожны асаблівы. А самыя яркія моманты гэтага сезону зафіксуюць зусім хутка. А пакуль можна праверыць інтуіцыю.
Фота ФХБ
