— Мы ўсе розныя, і кожны народ, кожная краіна мае права на выбар свайго шляху развіцця. Рэспубліка Беларусь, краіна працаўнікоў і стваральнікаў, выбрала свой шлях. У яго аснове — захаванне гістарычнай памяці, мірнае суіснаванне, дзяржаўны суверэнітэт, развіццё тэхналогій, адзінства прадстаўнікоў больш як 150 нацый і нацыянальнасцяў, 25 рэлігійных канфесій, — адзначыў Сяргей Хаменка.

Ён дадаў, што на рэалізацыю гэтых прынцыпаў нацэлены ўсе галіны ўлады і беларускі ўнікальны орган народаўладдзя — Усебеларускі народны сход.

— Вынікам гэтай палітыкі з’яўляецца 30-е месца Беларусі ў свеце па дасягненні Мэтаў устойлівага развіцця. Па дадзеных ААН, Рэспубліка датэрмінова дасягнула чатырох з іх: ліквідацыя галечы, чыстая вада і санітарыя, памяншэнне няроўнасці, захаванне экасістэм сушы. Узровень агульнага прагрэсу складае 80%, — заявіў нацыянальны каардынатар.

Ён асабліва акцэнтаваў увагу на тым, што Беларусь — сацыяльна арыентаваная дзяржава для чалавека і ў імя чалавека.

Віцэ-спікер Савета Рэспублікі прывёў некалькі паказчыкаў. Так, 43% бюджэту краіны выдаткоўваецца на сацыяльную сферу, а ўзровень беспрацоўя складае толькі 3%.

Парламентарый нагадаў, што ў Беларусі была пабудавана атамная электрастанцыя, краіна ўвайшла ў клуб касмічных дзяржаў, на тэрыторыю Беларусі забяспечаны бязвізавы ўезд для грамадзян са 101 дзяржавы, і падкрэсліў: «гатовыя абменьвацца вопытам і паказваць свае дасягненні».

— Як мудра адзначыў Прэзідэнт Рэспублікі Беларусь Аляксандр Рыгоравіч Лукашэнка, мы глядзім за гарызонт, робім усё, каб нашы дзеці і ўнукі, а потым іх дзеці і ўнукі жылі ў сваёй мірнай і квітнеючай дзяржаве. У гэтым рэчышчы ўжо падрыхтаваны праект Нацыянальнай стратэгіі развіцця да 2040-га года, — падкрэсліў ён. 

Паводле слоў парламентарыя, на шляху дасягнення прагрэсу наша краіна бачыць пагрозы і выклікі, якія перашкаджаюць устойліваму развіццю.

— Сёння свет знаходзіцца ў глыбокім геапалітычным крызісе. Маюць месца шматлікія ўзброеныя канфлікты, спробы ўмяшання ва ўнутраныя справы іншых дзяржаў, увядзенне незаконных санкцый, — акцэнтаваў увагу ён і прывёў красамоўныя прыклады. — На межах Беларусі знаходзіцца шматтысячная групоўка войскаў НАТА. Адкажыце, якая іх мэта? Сур’ёзнай пагрозай з’яўляюцца аднабаковыя прымусовыя меры, прасцей кажучы — санкцыі. І гэтыя бар’еры ўжываюць краіны, якія падпісалі Парадак-2030.

Парламентарый дадаў:

— Дазволю сабе нагадаць філасофскую мудрасць: даў слова — трымай, парушыць агідна. Удумайцеся, як паступаюць тыя, хто, падпісаўшы Парадак-2030, уводзіць санкцыі. Мы, беларусы, траціну стагоддзя падвергаліся інфармацыйнаму і санкцыйнаму ціску, загартаваліся і імкнемся рабіць свет лепшым.

У завяршэнне Сяргей Хаменка павіншаваў удзельнікаў форуму з 80-годдзем Перамогі над фашызмам:

— Думаю, кожны з нас разумее, што паўтарэнне гэтых жахаў немагчыма. Заклікаем міжнародную супольнасць адзіным фронтам падтрымліваць мірнае вырашэнне любых пытанняў і аб’яднаць намаганні па дасягненні Мэтаў устойлівага развіцця на карысць нашых краін і народаў.