Хайнань актыўна прасоўвае свае багатыя турыстычныя і культурныя рэсурсы як у Кітаі, так і за мяжой, дзякуючы чаму яго пазнавальнасць і прывабнасць для падарожнікаў з усяго свету ўвесь час растуць. У чэрвені ў Хайкоу (адміністрацыйны цэнтр Хайнаня) прайшоў азнаямленчы тур для замежных тураператараў. У рамках мерапрыемства больш як 400 кітайскіх і замежных турфірмаў правялі звыш 4 тысяч перагавораў і заключылі 226 пагадненняў аб супрацоўніцтве. Гэтая акцыя праводзіцца ўжо трэці год запар. Сёння Хайнань мае 46 турыстычных прадстаўніцтваў па ўсім свеце, якія ахопліваюць ключавыя рынкі Еўропы, Амерыкі і Азіі.

Акрамя таго, турыстаў знаёмяць з малавядомымі тэрыторыямі Хайнаня. Так, Лэдун-Ліскі аўтаномны павет, які суседнічае з папулярнай Санья, прадставіў тураператарам трапічны лясны запаведнік Цзяньфэнлін і саляныя промыслы Інгэхай. Цюнчжун-Лі-Мяоскі аўтаномны павет прыцягвае ўвагу нематэрыяльнай спадчынай і экатурызмам.

Хайнань паслядоўна ператварае ўнікальныя рэсурсы — ад трапічных лясоў і аздараўленчага турызму да нематэрыяльнай культурнай спадчыны, самабытнай сельгаспрадукцыі і медыцынскіх паслуг — у гатовыя турпрадукты для прамога браніравання праз міжнародных тураператараў. 

Росту замежнага турпатоку садзейнічае і ўдасканаленне інфраструктуры для замежных гасцей. Хайнань энергічна пашырае маршрутную сетку. Рэйсы ў Мінск, Маскву, Алма-Ату і Астану пачасціліся, а лінія Хайкоў — Джакарта з чэрвеня выконваецца шэсць разоў на тыдзень.

Рэалізуюцца меры па спрашчэнні візавага рэжыму. Грамадзяне 86 краін па агульнаграмадзянскіх пашпартах могуць уязджаць на Хайнань без візы, а таксама карыстацца правам 240-гадзіннага бязвізавага транзіту. Паралельна паляпшаецца якасць турыстычных паслуг: у аэрапортах і магазінах бяспошліннага гандлю зараз прымаюцца замежныя банкаўскія карты, а гарачая лінія 12345 для сувязі з сэрвіснай службай працуе на некалькіх мовах. У выніку індэкс задаволенасці турыстаў на востраве вырас з 85,2% у 2023 годзе да 97,5% летась.