Кіраўніку дзяржавы было дэталёва даложана аб правядзенні палявых работ у паўночным рэгіёне, сітуацыі на прадпрыемствах перапрацоўчай прамысловасці, кадравай рабоце, у тым ліку з маладымi спецыялістамі. Уборачная ў Віцебскай вобласці выйшла на фінішную прамую. Як запэўніў кіраўнік рэгіёна, пры добрых умовах надвор’я астатняя частка ўраджаю можа быць убрана на працягу двух дзён. Уклад Віцебскай вобласці ў агульны каравай перасягнуў метку ў 900 тысяч тон.

Асобна кіраўнік дзяржавы пацікавіўся станам прамысловасці, у тым ліку перапрацоўкай мяса-малочнай прадукцыі, паведамляе прэс-служба Прэзідэнта. Было адзначана, што эфектыўная работа ў гэтым кірунку станоўча паўплывае на развіццё сельскай гаспадаркі рэгіёна. Адзін з прыкладаў — Аршанскі мясакамбінат, які быў перададзены агракамбінату «Дзяржынскі». На гэтым прадпрыемстве вырашана павялічыць аб’ёмы вытворчасці, што ў сваю чаргу запатрабуе далейшага развіцця сыравіннай базы.

Яшчэ адной тэмай даклада стала кадравая работа ў Віцебскай вобласці. Асаблівы акцэнт у дадзеным кірунку зроблены на прыцягненні і замацаванні на рабочых месцах маладых спецыялістаў. Для іх падтрымкі распрацавана спецыяльная праграма, якая ўключае не толькі дадатковыя выплаты, але і забеспячэнне жыллём. Акрамя таго, запрашэнне грамадзян Узбекістана на працу ў сельгаспрадпрыемствы Віцебскай вобласці паказвае эфектыўнасць. Як адзначыў Аляксандр Рагожнік, у гаспадарках рэгіёна, дзе працуюць узбекскія спецыялісты, пра іх адгукаюцца станоўча.

«Арганізаваная і зладжаная работа дазволіла значна нарасціць тэмп»

Як расказаў Аляксандр Рагожнік журналістам, уборачная кампанія ў Віцебскай вобласці падыходзіць да фінішу. «На сёння намалочана 950 тысяч тон, — канкрэтызаваў ён. — Ураджайнасць — на ўзроўні мінулага года, набліжаецца да мільёна тон. Мы ідзём з вельмі добрым тэмпам да ўзроўню мінулага года па ўборцы, але нам неабходна яшчэ літаральна два пагодлівыя дні, каб мы маглі гэту работу завяршыць. На жаль, апошнія дні надвор’е ў Віцебскай вобласці не радуе, ідуць праліўныя дажджы, але мы ў любым выпадку пытанне з уборкай ураджаю вырашым».

Аляксандр Рагожнік адзначыў, што тэмп уборкі залежаў ад своечасовай і якаснай падрыхтоўкі тэхнікі. «Нам аказалі дапамогу і Міністэрства абароны, іншыя профільныя міністэрствы, — канстатаваў губернатар. — Прамысловасць вельмі моцна падставіла плячо. Усе арганізацыі Віцебскай вобласці былі задзейнічаны і ў рамонце тэхнікі, і прадастаўленні механізатараў для гэтых мэт — каля тысячы чалавек. Гэта арганізаваная і зладжаная работа дазволіла значна нарасціць тэмп. Мы ўжо, па сутнасці, завяршылі, сяўбу азімага рапсу, і, як адзначыў Прэзідэнт, такога яшчэ ў Віцебскай вобласці не было. Таму станоўчыя зрухі і вынікі бачныя».

«Акцэнт робім на моладзі»

Перспектывы развіцця аграпрамысловага сектара Віцебскай вобласці, па словах губернатара, непасрэдна звязаны з павышэннем эфектыўнасці перапрацоўчай прамысловасці.

«Што да мясной перапрацоўкі, мы на 100% разумеем, як дзейнічаць, — заўважыў Аляксандр Рагожнік. — Прыход агракамбіната „Дзяржынскі“ на Аршанскі мясакамбінат паказаў, што эфектыўнасць можа быць павышана ў разы. І тут вельмі вялікі патэнцыял. У рамках візіту Прэм’ер-міністра на гэта прадпрыемства прынялі рашэнне па павелічэнні аб’ёму вытворчасці дзіцячага харчавання, вытворчасці корму для жывёл. Сёння „Дзяржынскі“ заходзіць і на Віцебскі мясакамбінат. Вельмі добра ідуць работы па рэканструкцыі Полацкага малочнага камбіната. Гэты праект у першым квартале наступнага года будзе завершаны. Мы атрымаем самую сучасную ў маштабе краіны вытворчасць».

Старшыня Віцебскага аблвыканкама акцэнтаваў увагу на тым, што на перапрацоўку трэба падцягваць і гаспадаркі, бо гэта своечасовы разлік за сыравіну, цэны на сыравіну. «Работа вядзецца, на мой погляд, вельмі якасна, — лічыць Аляксандр Рагожнік. — Мы сёння сфарміравалі праграму развіцця да 2030 года. І ўся перапрацоўка атрымае зусім іншае дыханне».

Губернатар дадаў, што на чале любой справы заўсёды стаіць чалавек, і менавіта ад гэтага залежыць вынік. «Акцэнт робім на моладзі, — удакладніў ён. — У вобласці распрацавана спецыяльная праграма па падтрымцы маладых спецыялістаў, ажыццяўляецца даплата ў выпадку, калі малады спецыяліст заключае кантракт на працяглы тэрмін. Акрамя грошай, безумоўна, важны і складнік па бытавых умовах. Таму мы робім акцэнт на прадастаўленні жылля, будаўніцтве новых дамоў для маладых сем’яў».

Акрамя таго, кіраўнік вобласці выказаўся аб супрацоўніцтве з Узбекістанам. «Тыя спецыялісты, якія працуюць сёння ў гаспадарках рэгіёна, маюць добрыя водгукі, — адзначыў ён. — Таму, на мой погляд, гэта прыносіць узаемны выгадны вынік для двух бакоў».

Паводле БелТА

Акцэнт — на перапрацоўцы. Рагожнік назваў ключавыя драйверы развіцця рэгіянальнага АПК