Па звестках Кітайскага інфармацыйнага цэнтра сеткі Інтэрнэт, колькасць карыстальнікаў сэрвісаў і паслуг дастаўкі ежы ў Кітаі дасягнула 545 мільёнаў чалавек, што складае каля 50 працэнтаў ад агульнай колькасці інтэрнет-карыстальнікаў. Гэтыя паказчыкі значна перавышаюць паказчыкі іншых краін, перадае «Жэньмінь жыбаа» анлайн».
Па даных Кітайскай асацыяцыі гасцініц і рэстаранаў, у 2023 годзе аб’ём кітайскага рынку грамадскага харчавання і дастаўкі ежы склаў каля 1,2 трлн. юаняў, што адпавядае 22,6 працэнта ад агульнай выручкі ў сферы грамадскага харчавання. Мадэлі інтэрнэт-маркетынгу, у ліку якіх дастаўка ежы, сталі важнай крыніцай даходу для кампаній, якія працуюць у гэтай сферы.
«На пачатковым этапе індустрыя дастаўкі ежы сутыкнулася з некаторымі цяжкасцямі, аднак імклівае развіццё сэрвісаў дастаўкі і змяненні ў спажывецкіх звычках насельніцтва стварылі новыя магчымасці для яе росту», — заявіў Шы Сяамін, старшыня праўлення спецыялізаванага камітэта па справах індустрыі дастаўкі ежы Кітайскай асацыяцыі гасцініц і рэстаранаў.
Раней дастаўка ў Кітаі была засяроджана толькі на гатовых стравах, а зараз ахоплівае ўсе катэгорыі тавараў. Дзякуючы разнастайнай і разумнай сістэме сфера паслуг па дастаўцы ежы і прадуктаў увесь час пашыраецца. Яна ахоплівае як грамадскае харчаванне, так і рознічны гандаль, у тым ліку супермаркеты, тавары першай неабходнасці і лекі.
«Сэрвіс дастаўкі ежы больш не абмяжоўваецца простай службай дастаўкі прадуктаў харчавання. Ён ператварыўся ў сапраўдную экасістэму, якая аб’ядноўвае розныя брэнды грамадскага харчавання, упаковачныя кампаніі, пастаўшчыкоў сыравіны, транспартныя кампаніі і іншыя напрамкі», — адзначыў Шы Сяамін.
Абарона навакольнага асяроддзя і клопат аб здароўі сталі ключавымі аспектамі ў канкурэнтнай барацьбе брэндаў, якія прапануюць паслугі дастаўкі. Некалькі гадоў таму звычайнае пакаванне для такой ежы ўяўляла сабой скрынкі з белага пенапласту, аднак цяпер шырока выкарыстоўваюцца экалагічна чыстыя матэрыялы, такія як кукурузнае валакно і цэлюлоза з бамбука.
У канцы 2023 года быў распрацаваны і ўкаранёны першы нацыянальны стандарт «зялёнай» дастаўкі ежы. Згодна з гэтым стандартам, прадпрыемствы, якія займаюцца падрыхтоўкай прадуктаў харчавання на вынас, абавязаны скараціць выкарыстанне ўпаковачных матэрыялаў і замяніць іх больш экалагічнымі аналагамі. Гэта дазволіць пазбегнуць ці зменшыць забруджванне навакольнага асяроддзя.
У перспектыве Кітай плануе падтрымліваць сумежныя прадпрыемствы ў стварэнні экалагічна чыстай сістэмы дастаўкі. Для гэтага будуць выкарыстоўвацца інавацыі, тэхналагічныя дасягненні і трансгранічнае супрацоўніцтва. У выніку атрымаецца скараціць колькасць выкарыстоўванага пакавання, падвысіць бяспеку і надзейнасць дастаўкі, а таксама эфектыўна прасоўваць высакаякаснае развіццё гэтай індустрыі.
