Кітай увёў у аднабаковым парадку або па ўзаемнай дамове бязвізавы рэжым для грамадзян 75 краін, перадае «Сіньхуа». 

Гэта адбылося ў рамках намаганняў краіны па аптымізацыі візавых правіл і садзейнічанні міжнародным абменам, заявіў начальнік Дзяржаўнага ўпраўлення па справах міграцыі КНР Ван Чжычжун. Цягам 14-й пяцігодкі (2021--2025 гг.) таксама павялічылася колькасць краін, у адносінах да грамадзян якіх дзейнічае бязвізавы транзіт праз Кітай, — іх стала 55. Колькасць КПП, праз якія можна ажыццяўляць уезд у краіну, узрасла да 60, ахопліваючы 24 правінцыі, аўтаномныя раёны і гарады цэнтральнага падпарадкавання, паведаміў кіраўнік ведамства.

Акрамя таго, тэрмін бязвізавага транзіту павялічылі да 240 гадзін. Як адзначыў Ван Чжычжун, усе гэтыя меры значна аблегчылі паездкі іншаземцаў, якія наведваюць Кітай у турыстычных, дзелавых і іншых мэтах. «На аснове свайго асабістага вопыту многія замежныя госці атрымалі ўяўленне аб сапраўдным і шматгранным Кітаі», — сказаў ён.

Паводле афіцыйных даных, за перыяд 14-й пяцігодкі органы пагранічнага кантролю Кітая дазвалялі ўезд на тэрыторыю КНР і выезд з яе звыш 1,5 мільярда чалавек, а таксама агледзелі і прапусцілі звыш 98 млн транспартных сродкаў, у тым ліку самалёты, караблі, цягнікі і аўтамабілі.

«Сістэма мытнага афармлення на кітайскіх КПП стала адной з найбольш эфектыўных у свеце», — падкрэсліў Ван Чжычжун. Ён таксама дадаў, што Дзяржаўнае ўпраўленне па справах міграцыі КНР засяроджвае намаганні на ажыццяўленні больш актыўнай, адкрытай і эфектыўнай стратэгіі па прыцягненні кваліфікаваных кадраў, садзейнічанні стварэнню комплекснай сістэмы падтрымкі, якая ахоплівае ўязныя візы, дазвол на часовае знаходжанне і віды на жыхарства, а таксама іншыя спадарожныя паслугі.

«Многія міжнародныя спецыялісты высокага ўзроўню прыехалі ў Кітай, каб удзельнічаць у кітайскай мадэрнізацыі і адыгрываць тым самым пазітыўную ролю ў шэрагу важных сектараў», — рэзюмаваў Ван Чжычжун.