Ад народнай памяці да дзяржаўнага падарунка

У 1950 годзе больш за 20 рабочых Цяньцзіньскага веласіпеднага завода ў аднайменным горадзе Паўночнага Кітая добраахвотна аб’ядналіся, каб стварыць першы трывалы, даўгавечны і вядомы кітайскі веласіпед. Так нарадзіўся легендарны брэнд Feige («Лятучы голуб»), назва якога сімвалізавала імкненне да міру.

Ужо да 1950-х гадоў веласіпеды гэтай маркі сталі неад’емнай часткай гарадскога пейзажа краіны. У 1989 годзе гадавы аб’ём вытворчасці дасягнуў 3,68 млн адзінак — дзясятай часткі ад агульнанацыянальнага паказчыка. Больш за тое, 22 веласіпеды Feige былі паднесены замежным афіцыйным асобам у якасці дзяржаўных падарункаў.

У новую эпоху брэнд зрабіў стаўку на эксклюзіўнасць і высокія тэхналогіі. Яркі прыклад — мадэль «Водар лотаса»: яе звышлёгкая рама выканана з вуглевалакна, а корпус уручную распісаны ў тэхніцы традыцыйнага кітайскага лакавага жывапісу з інкрустацыяй сусальным золатам. Сёння асартымент Feige налічвае больш за 2000 мадэляў — ад прафесійных шашэйных веласіпедаў да дзіцячых і гарадскіх.

Інавацыі на алімпійскім узроўні

Кампанія Shandong Taishan Ruibao Composite Material, заснаваная ў 2010 годзе ў правінцыі Шаньдун (Усходні Кітай), з’яўляецца ўладальнікам брэнда прафесійных спартыўных веласіпедаў PARDUS. Самая лёгкая рама кампаніі вышэйшага класа важыць усяго 680 грамаў. Дакладнасць вырабу рам прадукцыі PARDUS дасягае 0,02–0,07 мм, што прыкладна ў тры разы танчэй за чалавечы волас.

На Алімпійскіх гульнях у Рыа-дэ-Жанейра ў 2016 годзе PARDUS стаў першым кітайскім брэндам, які выйшаў на алімпійскі трэк і разбурыў векавую манаполію еўрапейскіх і амерыканскіх вытворцаў. Веласіпеды PARDUS таксама выкарыстоўваліся як афіцыйны інвентар зборнай КНР на Гульнях у Токіа і Парыжы.

Цяпер брэнд актыўна ўкараняе алімпійскія аэрадынамічныя тэхналогіі ў грамадзянскі сектар, экспартуючы прадукцыю ў Еўропу і Паўднёва-Усходнюю Азію. Кампанія штогод выпускае 200 тыс. карбонавых веласіпедаў, на якія прыпадае траціна кітайскага рынку вугляпластыкавых мадэляў.

Сінтай — веласіпедная сталіца экспарту

Горад Сінтай у правінцыі Хэбэй (Паўночны Кітай) — прызнаны цэнтр веласіпеднай вытворчасці. Галіна сфарміравалася тут у 1970-х гадах. Сёння ў кластары налічваецца больш за 4500 прадпрыемстваў, а прадукцыя пастаўляецца больш як у 100 краін.

У павеце Пінсян дзейнічае комплексная платформа дзяржаўных паслуг, якая дазваляе кампаніям прайсці сертыфікацыю 3C і ўсе мытныя працэдуры, не выязджаючы за межы павета. Ключавым экспартным акном стала міжнародная выстава веласіпедаў і дзіцячага транспарту, якая сабрала ў красавіку гэтага года больш за 1600 удзельнікаў.

У павеце Гуанцзун працуе база прамых трансляцый, якая забяспечвае прадпрыемствам доступ да замежных рынкаў і аналітыкі сусветнага спажывецкага попыту ў рэальным часе. У 2025 годзе павет экспартаваў веласіпедаў і дзіцячых транспартных сродкаў на 1,15 млрд юаняў, што амаль на чвэрць (на 23,2%) больш, чым годам раней.

Мікалай ЛІТВІНАЎ