Цзоў Інцзы прызнаны майстар кітайскага дэкаратыўна-прыкладнога мастацтва і прадстаўнік нематэрыяльнай культурнай спадчыны Кітая ў тэхніцы сучжоўскай вышыўкі (сусюй). Ёй удалося ўзняць традыцыйнае рамяство да ўзроўню сапраўднага мастацтва дзякуючы сваім інавацыям, цярпенню і майстэрству, перадае «Жэньмінь жыбаа» анлайн».

На аснове традыцыйных тэхнік яна стварыла ўласны стыль, які ўвабраў элементы жывапісу, фатаграфіі і скульптуры. Яе аўтарскі спосаб вышывання шляхам «кропельных шаўкоў» (дзідзісюй) стаў першай запатэнтаванай тэхнікай вышыўкі ў Кітаі.

Цзоў Інцзы нарадзілася ў горадзе Сучжоу, што ў правінцыі Цзянсу (Усходні Кітай). 53-гадовая майстрыха пачала вучыцца вышыўцы ў маці з шасці гадоў. Да дваццаці гадоў яна ўжо дасканала валодала традыцыйнымі тэхнікамі.

Імкнучыся да большай выразнасці, Цзоў Інцзы распрацавала «дзідзісюй», які мае на ўвазе стварэнне вельмі кароткіх шаўкоў (0,2-0,3 мм), якія ператвараюць лінейныя шаўкі ў кропкавыя. Працы набываюць трохмернасць, з багатай гульнёй святла і цені.

Цзоў Інцзы імкнецца пашырыць тэматыку сусюй, уключаючы ў яе выявы старажытных гарадскіх сцен, чарапіцы, цаглянай разьбы, бронзавых артэфактаў і фрэсак. Майстрыха аднавіла найбуйнейшую старажытную кітайскую вышыўку «Цудатворны абраз з Лянчжоу» шырынёй 160 см і даўжынёй 241 см, зрабіўшы больш за тры мільёны шаўкоў. У працэсе працы яна аднавіла страчаную тэхніку «расшчэпленага сцяжка» эпохі Тан (618-907 гг.). Гэтая праца была набыта для калекцыі Даследчага інстытута Дуньхуана.

«Майстар павінен імкнуцца да ўдасканалення тэхнікі. Толькі седзячы за пяльцамі, я знаходжу спакой», — кажа Цзоў Інцзы.