Android A2, распрацоўшчыкам якога з’яўляецца шанхайская кампанія Agibot, адправіўся ў шлях з горада Сучжоу (правінцыя Цзянсу, Усходні Кітай) і дасягнуў пункта прызначэння — набярэжнай Вайтань горада Шанхай.

На працягу ўсяго шляху робат, абсталяваны сістэмай хуткай замены акумулятараў Agibot, быў увесь час уключаным. «Дабрацца пешшу з горада Сучжоу ў Шанхай — гэта няпростая задача для людзей, аднак робату гэта па плячы», — адзначыў віцэ-прэзідэнт кампаніі Agibot Ван Чуан. Дасягненне Android A2 даказвае надзейнасць апаратнага забеспячэння робата, алгарытмаў раўнавагі яго «мазжачка» і цягавітасці, што заклала трывалую аснову для буйнамаштабнага камерцыйнага ўкаранення, дадаў прадпрымальнік.

Робат Android A2 абсталяваны двума модулямі GPS, лідарнымі і інфрачырвонымі датчыкамі, прызначанымі для дакладнага пазіцыянавання днём і ноччу ў складаных сітуацыях, такіх як святлафоры, вузкія праходы і перапоўненыя тратуары. Робат перамяшчаўся па асфальтаваных дарогах, брукаваных тратуарах, мастах, тактыльных пакрыццях і пандусах пры строгім выкананні правіл дарожнага руху.

Размаўляючы з карэспандэнтам «Сіньхуа» па прыбыцці, робат апісаў свой далёкі паход як «незабыўны вопыт у яго жыцці», жартаўліва выказаўшы здагадку, што яму «можа спатрэбіцца новы абутак».

Як вядома, у красавіку гэтага года робат Tien Kung Ultra, створаны Пекінскім цэнтрам інавацый у галіне гуманоідных робатаў, пераадолеў паўмарафонскую дыстанцыю ў 21 км за 2 гадзіны 40 хвілін.