Група навукоўцаў Паўночна-заходняга політэхнічнага ўніверсітэта пад кіраўніцтвам акадэміка Чжан Вэйхуна сумесна з даследчыкамі з Гарадскога ўніверсітэта Сянгана і Сянганскага політэхнічнага ўніверсітэта распрацавалі шматфункцыянальнага мікраробата з гнуткім корпусам, перадае «Жэньмінь жыбаа» анлайн.
Дадзенае даследаванне значна павысіла працаздольнасць мікраробатаў у экстрэмальных і абмежаваных асяроддзях. Гэты шматфункцыянальны мяккі мікраробат створаны на аснове электраактыўных палімераў. Ва ўмовах звышнізкіх тэмператур да мінус 50 °C робат здольны выконваць задачы аўтаномнага нагрэву, інспекцыі і плаўлення ледзянога покрыва. У такіх сцэнарыях выкарыстання, як праверка авіяцыйных рухавікоў, абследаванне шчылін і работа ў лядовых рэгіёнах, ён дэманструе значныя перавагі.
Вынікі даследавання былі апублікаваны ў анлайн-версіі міждысцыплінарнага навуковага часопіса Advanced Science.
