Толькі за першыя чатыры месяцы 2026 года аб’ём экспарту лекавай сыравіны з Бачжоу перавысіў 300 мільёнаў юаняў, павялічыўшыся на 37% у параўнанні з аналагічным перыядам мінулага года.

Бачжоу жыве ў атмасферы лекавых водараў ужо больш за тысячу гадоў. Штодня на яго спецыялізаваным рынку прадстаўлена больш за 2800 відаў траў традыцыйнай кітайскай медыцыны. Тут збіраюцца гандляры і пакупнікі з усіх куткоў краіны, а гадавы аб’ём гандлю перавышае 56 млрд юаняў.

Мясцовыя прадпрыемствы актыўна пераходзяць ад экспарту сыравіны да вытворчасці прадукцыі з высокай дабаўленай вартасцю. Яркі прыклад — кампанія «Шэнлінь», экспарцёр традыцыйных лекавых сродкаў, у партфелі якой звыш 20 патэнтаў. Прадпрыемства ўкараніла ўнікальную тэхналогію апрацоўкі, якая гарантуе стандартызаваную якасць прадукцыі. Для кантролю характарыстык лекавых раслін кампанія напрамую супрацоўнічае з фермерамі: забяспечвае ім агранамічную падтрымку і закупляе сыравіну па цэнах, вышэйшых за рыначныя.

Як паведамілі ў Бюро па развіцці фармацэўтычнай прамысловасці горада Бачжоу, высокая якасць прадукцыі і шэраг спрыяльных палітычных мер паскорылі тэмпы выхаду бачжоўскіх фармацэўтычных тавараў на замежныя рынкі. Так, раслінны супрацьпрастудны прэпарат, выраблены бачжоўскім фармацэўтам, ужо шэсць гадоў паспяхова рэалізуецца ў аптэчных сетках Германіі. Да цяперашняга часу афіцыйную сертыфікацыю ў ФРГ прайшлі 193 віды бачжоўскіх грануляваных прэпаратаў ТКМ, што адкрыла ім доступ на рынак лекавых сродкаў усяго Еўрасаюза.

За дзесяць гадоў кампанія «Вэйба» павялічыла гадавы аб’ём экспарту з нуля да 4 млн долараў ЗША, паспяхова асвоіўшы рынкі В’етнама, Тайланда і Малайзіі. Сакрэт поспеху — дакладная адаптацыя да мясцовых патрабаванняў: ад маркіроўкі на нацыянальных мовах да выкарыстання звыклых для лакальных пакупнікоў фарматаў пакавання. Шэраг прэпаратаў ТКМ ад кампаніі ператварыліся ў сапраўдныя «хіты продажаў» на рынку Паўднёва-Усходняй Азіі.

У верасні 2024 года ў Бачжоу быў заснаваны пастаянны сакратарыят Савета па супрацоўніцтве ў галіне традыцыйнай кітайскай медыцыны ў рамках Усебаковага рэгіянальнага эканамічнага партнёрства. Гэта дазволіла гораду наладзіць узаемадзеянне з шасцю краінамі АСЕАН і 11 галіновымі асацыяцыямі. Сёння 210 прадпрыемстваў Бачжоу вядуць гандлёвыя адносіны з краінамі — удзельніцамі УРЭП.

У мінулым годзе агульны аб’ём імпарту і экспарту лекавай расліннай сыравіны Бачжоу дасягнуў 770 мільёнаў юаняў, што складае амаль 90% ад агульнага паказчыка правінцыі.