Беларуская дэлегацыя на чале са Старшынёй Савета Рэспублікі Наталляй Качанавай узяла ўдзел у чацвёртым Узбекска-беларускім форуме. Тры папярэднія мерапрыемствы праходзілі ў фармаце жаночых бізнес-форумаў, але сёлета было вырашана надаць форуму больш шырокі статус і зрабіць міжпарламенцкім. Пры гэтым у старажытную ўзбекскую Хіву прыбылі не толькі парламентарыі, але і прадстаўнікі міністэрстваў, ведамстваў, бізнесу, устаноў аховы здароўя, рэктары ВНУ і члены Маладзёжнага парламента. На палях форуму адбылося прыняцце Хівінскай дэкларацыі, а таксама падпісанне пакета пагадненняў і камерцыйных кантрактаў.

«Парламенцкая дыпламатыя з’яўляецца важным складнікам міждзяржаўных адносін»

У прывітанні ўдзельнікам Узбекска-беларускага міжпарламенцкага форуму Прэзідэнт Беларусі Аляксандр Лукашэнка адзначыў, што арганізацыя такога прадстаўнічага мерапрыемства наглядна пацвярджае высокую дынаміку двухбаковага ўзаемадзеяння, надае яму шматграннасць. «Адкрыты дыялог заканадаўцаў Беларусі і Узбекістана дазволіць гарманізаваць нарматыўна-прававую базу дзвюх краін, развіваць ініцыятывы, накіраваныя на паглыбленне палітычных, эканамічных і гуманітарных сувязяў», — падкрэсліў ён.

Прывітанне ўдзельнікам форуму таксама накіраваў Прэзідэнт Узбекістана Шаўкат Мірзіёеў.

Выступаючы на пленарным пасяджэнні форуму «Стратэгічнае партнёрства: развіццё парламенцкага дыялогу, новыя задачы і перспектывы супрацоўніцтва» Старшыня Савета Рэспублікі Наталля Качанава выказала ўпэўненасць у тым, што гістарычная планка тавараабароту ў 1 мільярд долараў паміж Беларуссю і Узбекістанам будзе пераадолена па выніках 2026 года. Спікер падкрэсліла, што ўсе пляцоўкі і мерапрыемствы форуму выступаюць эфектыўным каталізатарам эканамічнага супрацоўніцтва Беларусі і Узбекістана, росту аб’ёмаў узаемнага гандлю. Яна нагадала, што летась тавараабарот паміж нашымі краінамі склаў 854 мільёна долараў.

Наталля Качанава падкрэсліла, што патэнцыял узаемадзеяння значна вышэйшы. «Перад намі стаіць амбіцыйная задача — выйсці на мяжу ў 2 мільярды долараў. На палях форуму было падкрэслена, што і гэта не мяжа, — дадала яна. — Беларусь гатовая і далей нарошчваць пастаўкі ва Узбекістан грузавой і пасажырскай тэхнікі, сельскагаспадарчых машын, аптычнага абсталявання, прадуктаў нафтахіміі, лекавых сродкаў, прадуктаў харчавання. Мы ў сваю чаргу зацікаўлены ў пашырэнні паставак плодаагародніннай прадукцыі, каляровых металаў».

Спікер таксама падкрэсліла, што тэма форуму выбраная невыпадкова. «Парламенцкая дыпламатыя з’яўляецца важным складнікам міждзяржаўных адносін. Яна дапамагае найлепш разумець пазіцыі адзін аднаго, знаходзіць агульныя рашэнні і ўстараняць магчымыя бар’еры. Па даручэнні прэзідэнтаў верхнія палаты парламентаў ажыццяўляюць пастаянны кантроль за рэалізацыяй дамоўленасцяў, дасягнутых на найвышэйшым узроўні. Супрацоўніцтва паміж заканадаўчымі органамі нашых краін будуецца на сістэмнай аснове», — адзначыла яна.

«Наша сістэмнае партнёрства забяспечвае ўпэўнены ўздым гандлёва-эканамічных сувязяў»

Беларусь бачыць перспектывы для паглыблення інтэграцыі з Узбекістанам у машынабудаванні, заявіў на пленарным пасяджэнні форуму намеснік Прэм’ер-міністра Юрый Шулейка. Узбекістан для Беларусі — адзін з ключавых гандлёва-эканамічных партнёраў у Цэнтральнай Азіі. Па аб’ёмах знешняга гандлю ён займае трэцяе месца сярод краін СНД і дзявятае сярод усіх краін свету.

«Наша сістэмнае партнёрства забяспечвае ўпэўнены ўздым гандлёва-эканамічных сувязяў. Захоўваючы і развіваючы традыцыйны фармат знешнегандлёвага абмену, мы перайшлі ў стадыю больш глыбокай прамысловай, навукова-тэхнічнай і міжрэгіянальнай інтэграцыі», — адзначыў віцэ-прэм’ер.

Наглядным пацвярджэннем пераходу ад традыцыйнага гандлю да глыбокай вытворчай кааперацыі і спалучэння эканомік стала падпісанне за два дні работы форуму 59 прамых кантрактаў паміж прадпрыемствамі і арганізацыямі Беларусі і Узбекістана. Пагадненні ахопліваюць стварэнне сумесных вытворчасцяў, узаемныя пастаўкі прадукцыі, а таксама кааперацыю ў сферах машынабудавання, харчовай і хімічнай прамысловасці, аховы здароўя і турызму. Дакументы падпісаныя на суму каля 420 мільёнаў беларускіх рублёў.

Супрацоўніцтву на гуманітарным і навукова-адукацыйным вектары фундаментальнай апорай служаць 550 пагадненняў паміж вышэйшымі навучальнымі ўстановамі дзвюх краін.

Наталля Качанава нагадала мудрую ўзбекскую прыказку аб тым, што, аб’яднаўшыся, можна дасягнуць любых мэт, выказаўшы ўпэўненасць, што прынятыя рашэнні і Хівінская дэкларацыя стануць важкім унёскам у росквіт двух брацкіх народаў.

Паводле прэс-службы Савета Рэспублікі