«Летась у нашай краіне выраслі аб’ёмы перакладной літаратуры. За 2025 год у Беларусі былі выдадзеныя кнігі на 25 мовах свету», — сказаў Андрэй Кунцэвіч.

Паводле яго слоў, краіны, якія прадставілі свае кнігі на выстаўцы-кірмашы, дапамагаюць умацоўваць падмурак для далейшага развіцця міждзяржаўных адносін, дыялогу паміж рознымі культурамі і народамі. У Беларусі разумеюць, наколькі важнае міжнароднае супрацоўніцтва, у тым ліку ў развіцці кнігавыдання, таму надаюць гэтаму ўвагу на самым высокім дзяржаўным узроўні.

«Мінская міжнародная кніжная выстаўка-кірмаш 2026 года ўзяла ўпэўнены старт. Яна працягвае радаваць і здзіўляць усіх, хто любіць добрую і якасную літаратуру. За першы дзень выставы ў мерапрыемствах форуму прынялі ўдзел больш за 11 тыс. чалавек, што супастаўна з насельніцтвам аднаго, няхай і невялікага беларускага раённага цэнтра», — заўважыў першы намеснік міністра інфармацыі.

Ён дадаў, што ў краіне выраслі аб’ёмы беларускамоўнай літаратуры. Таксама назіраецца рост дзіцячай літаратуры, што пацвярджае тэзіс аб запатрабаванасці кнігі сёння. Паводле сацыялагічнага даследавання Міністэрства інфармацыі, 83,6% апытаных аддаюць перавагу папяроваму варыянту кнігі, хоць электронныя кнігі таксама запатрабаваныя. Пры гэтым найбольшы ўзровень прыхільнасці да чытання кніг назіраецца ва ўзроставай групе да 29 гадоў.

«Вельмі важна, што ў эпоху бяздушных лічбаў кніга і ў цэлым чытанне дазваляюць захоўваць духоўнасць, маральныя арыенціры і маральныя прыярытэты, якія, на жаль, у лічбавым фармаце сёння часцяком адсутнічаюць», — падсумаваў Андрэй Кунцэвіч.