«Гэта серыі кніг па тэме Вялікай Айчыннай вайны, генацыду беларускага народа і Вялікай Перамогі, якія мы выдалі за апошнія гады. Гэта гістарычная праўда, якую немагчыма перапісаць», — сказаў Уладзімір Пярцоў.

На сустрэчы з кіраўніцтвам Ніжагародскай вобласці першы намеснік кіраўніка Адміністрацыі падзякаваў за гасціннасць і дамашні прыём, а таксама за магчымасць пагрузіцца ў гісторыю, бо менавіта на яе падмурку будуецца будучыня нашых народаў.

«У сілу пэўных падзей і абмежаванняў мы надалі асаблівы інтэнсіў нашым інтэграцыйна-эканамічным адносінам. Напэўна, так павінна было адбыцца і раней, але гэты стымул дапамог нам зарыентавацца і зразумець, хто нашы сапраўдныя браты, сябры і саюзнікі, хто — сітуацыйныя партнёры, а хто адносіцца да іншай катэгорыі дзяржаў і народаў», — дадаў Уладзімір Пярцоў.

Паводле яго слоў, беларускі бок прыехаў у Ніжні Ноўгарад з асаблівай місіяй: прадставіць мясцовым жыхарам эмацыйны канцэрт-рэквіем «Кожны трэці», прэм’ерны паказ якога адбыўся на Паклоннай гары ў Маскве. Пазней яго ўбачылі беларускія гледачы, канцэрт паказалі таксама ў Крамлёўскім Палацы, у Санкт-Пецярбургу і ў Казані.

Уладзімір Пярцоў падкрэсліў: доўгі час лічылася, што ў Вялікай Айчыннай вайне загінуў кожны чацвёрты беларус, але ў 2021 годзе Генеральная пракуратура пачала расследаванне крымінальнай справы аб генацыдзе беларускага народа ў гады ВАВ, якая доўжыцца 5 гадоў і да гэтага часу не закрыта, паколькі ў рамках расследавання было знойдзена 166 месцаў масавага пахавання мірных беларускіх грамадзян.

«У асноўным гэта старыя, дзеці і жанчыны, якія не складаліся ў рэгулярным войску, партызанскім або падпольным руху. Яны былі забітыя проста так, па плане „ОСТ“ — плану знішчэння 75% насельніцтвы нашых земляў. І гэтая крымінальная справа працягваецца. Мы знаходзім іншыя пахаванні і, на жаль, можам гаварыць, што кожны трэці — ужо не канчатковая лічба», — падкрэсліў Уладзімір Пярцоў.

На яго думку, боль і трагедыя нашага народа рыфмуецца з падзеямі, якія адбываюцца зараз, з супрацьстаяннем новаму фашызму, з якім сёння ідзе ідэалагічная барацьба. І яна павінна грунтавацца на падмурку гістарычнай памяці, якую мы разам адраджаем.

Першы намеснік губернатара Ніжагародскай вобласці Андрэй Гневушаў адзначыў, што выхаванцы ніжагародскага ваенна-патрыятычнага клуба «Рассвет» амаль штогод наведваюць у Магілёўскай вобласці месцы баёў 137-й стралковай дывізіі, сфарміраванай у Горкаўскай вобласці. А ў Ніжні Ноўгарад прыязджаюць курсанты Мінскага сувораўскага ваеннага вучылішча. Акрамя таго, школьнікі і студэнты каледжаў Ніжагародскай вобласці, якія праславіліся сваімі дасягненнямі, пабывалі ў Брэсце і Мінску дзякуючы адукацыйнаму праекту «Урокі з падарожжам. 80-годдзе Перамогі». Супрацоўніцтва ў патрыятычным і іншых напрамках толькі развіваецца. 

Беларусь шмат гадоў уваходзіць у першую тройку па тавараабароце сярод больш як 100 знешніх партнёраў рэгіёну. Распрацавана праграма міжмуніцыпальнага супрацоўніцтва з Беларуссю на 2026-2028 гады, дзе сабрана каля 450 мерапрыемстваў: канферэнцыі, выставы, выступленні творчых калектываў, музычныя конкурсы, інвестыцыйныя, турыстычныя і навукова-адукацыйныя праекты. Развіваецца і сумесная вытворчасць трамваяў і электробусаў, а беларускія будаўнікі актыўна ўдзельнічаюць у рэалізацыі праектаў на тэрыторыі Ніжагародскага рэгіёна.