Конкурс «Працоўная дынастыя» — важны крок да ўмацавання традыцый і пераемнасці ў прамысловасці. Ён дазваляе не толькі выявіць лепшых работнікаў і прадпрыемствы, але і натхніць маладое пакаленне на выбар прафесій у вытворчай сферы, тым самым забяспечваючы ўстойлівае развіццё эканомікі краіны. У бягучым годзе конкурс прымеркаваны да 80-годдзя Перамогі ў Вялікай Айчыннай вайне, пяцігодкі якасці і прафесійнага свята — Дня машынабудаўніка.

Па словах міністра прамысловасці Андрэя Кузняцова, у сістэме прадпрыемстваў ідзе стабільнае развіццё. «На нашых прадпрыемствах ствараюцца сем’і, і яны гадуюць пакаленні, перадаючы свае навыкі. А наша моладзь стварае новы прадукт, які патрабуецца ўсяму свету, — адзначыў ён. — Гэты конкурс спрыяе развіццю прамысловага патэнцыялу краіны».

Конкурс праводзіцца з мэтай садзейнічання адраджэнню, захаванню і развіццю працоўных дынастый прадпрыемстваў Міністэрства прамысловасці і Беларускага дзяржаўнага канцэрна па вытворчасці і рэалізацыі тавараў лёгкай прамысловасці, кансалідацыі намаганняў па падтрымцы жаночых ініцыятыў у розных напрамках дзейнасці, развіцця патрыятызму, падтрымання традыцыйных сямейных каштоўнасцяў, а таксама павышэння згуртаванасці і сацыяльнай актыўнасці калектываў прадпрыемстваў.