Як выглядае беларуская сям’я і якія ўмовы для яе створаны, напярэдадні Дня сям’і ў фактах расказала прэс-служба Міністэрства працы і сацыяльнай абароны, паведамляе БелТА.
У ведамстве адзначылі, што больш за 95 працэнтаў маладых людзей краіны (18-28 гадоў) лічаць сям’ю галоўнай каштоўнасцю ў жыцці. Таксама 41,3 працэнта маладых беларусаў лічаць аптымальным мець дваіх дзяцей, 29,6 працэнта — адно дзіця, 8,1 працэнта — траіх, 0,3 працэнта — чацвярых і больш, а 8,7 працэнта не гатовы да нараджэння дзяцей. У 2024 годзе ў краіне было заключана 46,2 тыс. шлюбаў, але 34,9 тыс. пар развяліся.
Кожнае пятае дзіця ў Беларусі нараджаецца ў шматдзетнай сям’і. У краіне актыўна падтрымліваюць шматдзетныя сем’і, адной з мер падтрымкі з’яўляецца праграма «Сямейны капітал». Памер сямейнага капіталу для шматдзетных сем’яў у 2025 годзе складзе Br33 275 (з 2015 года ім скарысталіся 145 тыс. сем’яў). Таксама 80,5 тыс. шматдзетных сем’яў палепшылі жыллёвыя ўмовы за апошнія 10 гадоў.
На ўсіх дзяцей да 3 гадоў сем’і атрымліваюць штомесячныя дапамогі (ад Br861 на першае дзіця да Br1216 на другое). У сваю чаргу, бацькі плацяць за дзіцячы сад усяго 13-23 працэнты ад рэальнага кошту (для шматдзетных — скідка 50 працэнтаў). Акрамя таго, Беларусь уваходзіць у топ-10 краін з нізкай дзіцячай смяротнасцю.
Ужо 5 працэнтаў кампаній (з 400 апытаных) прадастаўляюць «бацькаўскі» водпуск, але попыт вышэйшы там, дзе ёсць аплата (ахоп у дзяржарганізацыях — 16,5 працэнта). У планах — суфінансаванне (50 працэнтаў — наймальнік, 50 працэнтаў — ФСАН). Таксама 120 кампаній удзельнічаюць у праграме «Кампаніі, дружалюбныя бацькам», ствараючы гібкія ўмовы для работнікаў з дзецьмі.
