На тэрыторыі Рэспублікі Беларусь праводзіцца сумеснае вучэнне з калектыўнымі сіламі аператыўнага рэагавання АДКБ «Узаемадзеянне-2025», накіраванае на адпрацоўку пытанняў падрыхтоўкі і правядзення сумеснай аперацыі па ўдзеле ў вырашэнні крызіснай сітуацыі на тэрыторыі дзяржавы — члена АДКБ, спецыяльнае вучэнне з сіламі і сродкамі разведкі «Пошук-2025», спецыяльнае вучэнне з сіламі і сродкамі матэрыяльна-тэхнічнага забеспячэння «Эшалон-2025». У вучэннях прымаюць удзел кантынгенты войскаў (Калектыўных сіл) АДКБ Рэспублікі Беларусь, Рэспублікі Казахстан, Кыргызскай Рэспублікі, Расійскай Федэрацыі і Рэспублікі Таджыкістан. Сярод іх — воінскія кантынгенты, фарміраванні сіл спецыяльнага прызначэння з ліку спецыяльных падраздзяленняў органаў унутраных спраў, органаў бяспекі і спецыяльных службаў, упаўнаважаных органаў у сферы папярэджання і ліквідацыі наступстваў надзвычайных сітуацый, а таксама аператыўныя групы Аб’яднанага штаба і Сакратарыята АДКБ.

Мерапрыемству далі старт у Віцебску. Вайскоўцы ўсклалі кветкі да помніка «Дэсантнікам усіх пакаленняў». У цырымоніі прынялі ўдзел ветэраны паветрана-дэсантных войскаў і сіл спецыяльных аперацый Узброеных Сіл Беларусі, ваеннаслужачыя 103-й Віцебскай асобнай гвардзейскай паветрана-дэсантнай брыгады, выхаванцы ваенна-патрыятычнага клуба «Гвардыя». Таксама ўсе ўдзельнікі вучэнняў усклалі кветкі да мемарыяльнага комплексу ў гонар воінаў-вызваліцеляў, партызан і падпольшчыкаў Віцебшчыны.

Ва ўрачыстай цырымоніі адкрыцця вучэнняў АДКБ прынялі ўдзел начальнік Генеральнага штаба — першы намеснік міністра абароны Беларусі генерал-маёр Павел Муравейка, начальнік Аб’яднанага штаба АДКБ Герой Расійскай Федэрацыі генерал-палкоўнік Андрэй Сердзюкоў, старшыня Віцебскага абласнога выканаўчага камітэта Аляксандр Субоцін, кіраўнік вучэння «Узаемадзеянне-2025» — камандуючы сіламі спецыяльных аперацый Узброеных Сіл Беларусі генерал-маёр Вадзім Дзенісенка, кіраўнік вучэння «Эшалон-2025» — першы намеснік начальніка тылу Узброеных Сіл Беларусі — начальнік штаба тылу генерал-маёр Аляксандр Масолаў, кіраўнікі воінскіх кантынгентаў.

«Дадзены старт тым вучэнням, якія сёлета праходзяць на нашай тэрыторыі. У рамках АДКБ вучэнні „Узаемадзеянне“, „Эшалон“, „Пошук“ праводзяцца штогод. У бягучым годзе гэта знакавая падзея выпала на нашу беларускую зямлю. У рамках вучэнняў плануецца адпрацаваць цэлы комплекс пытанняў па забеспячэнні грамадскай бяспекі, стварэнні ўмоў для процідзеяння знешняй агрэсіі, барацьбе з незаконнымі ўзброенымі фарміраваннямі і дыверсійна-разведвальнымі групамі праціўніка. Пры гэтым плануецца прымяняць самыя сучасныя прыёмы і спосабы дзеянняў, якія нам даў вопыт апошніх ваенных канфліктаў. Мы разглядаем пытанні прымянення беспілотных авіяцыйных комплексаў, рабатызаваных сістэм, пытанні радыёэлектроннай барацьбы, абароны і разгортвання сродкаў сувязі і камунікацый з выкарыстаннем апошніх дасягненняў IT-сістэм», — паведаміў журналістам Павел Муравейка.

Ён дадаў, што гэтыя пытанні адпрацоўваюцца ў рамках АДКБ, ваеннаслужачыя абменьваюцца перадавым вопытам, і кожнаму кантынгенту ёсць што паказаць. Павел Муравейка таксама адзначыў, што вучэнні досыць маштабныя і аб’ёмныя, у іх удзельнічаюць больш за 2 тыс.вайскоўцаў і 450 адзінак тэхнікі, у тым ліку дзевяць баявых самалётаў і верталётаў, звыш 70 рознатыповых БПЛА.