У Баку віцэ-спікер правёў сустрэчу з кіраўніком групы дружбы Мілі Меджліса Азербайджанскай Рэспублікі Зіядам Аліябасам Самедзадэ. Бакі падкрэслілі высокі ўзровень беларуска-азербайджанскага міжпарламенцкага супрацоўніцтва, выказалі гатоўнасць да яго далейшай актывізацыі, у тым ліку з выкарыстаннем патэнцыялу рабочых груп у парламентах абедзвюх дзяржаў.

Асаблівая ўвага звернута на неабходнасць удзелу парламентарыяў у забеспячэнні рэалізацыі дамоўленасцяў, дасягнутых на найвышэйшым узроўні, а таксама практычнага выканання рашэнняў двухбаковай міжурадавай камісіі.

Выступаючы на міжнароднай парламенцкай канферэнцыі, віцэ-спікер адзначыў, што прыняцце Канстытуцыі з’яўляецца найважнейшай вяхой у станаўленні і развіцці кожнай краіны і грунтуецца на неад’емным праве народа самастойна вызначаць свой лёс і быць паўнапраўным суб’ектам сусветнай супольнасці. Канстытуцыя вызначае аблічча грамадства і дзяржавы на многія гады, яго прававыя асновы і падмурак, лад жыцця і будучыню.

— Кожная краіна на шляху да дэмакратыі адпрацоўвае сваю мадэль дзяржаўнага будаўніцтва. Азербайджанская Рэспубліка, як і Рэспубліка Беларусь, цвёрда праводзіць незалежную палітыку. Доказам таму служаць нашы дасягненні ў розных сферах — стабільнасць палітычнай, эканамічнай і сацыяльнай сістэм, рост аўтарытэту на міжнароднай арэне, захаванне нацыянальнай самасвядомасці і традыцый, — падкрэсліў парламентарый.

На палях міжнароднай канферэнцыі Уладзіслаў Татарыновіч правёў сустрэчы з намеснікам старшыні Саюзнай Скупшчыны Сербіі Ёханам Янічам і старшынёй Глабальнага савета цярпімасці і міру Ахмедам Махамедам Аль-Джарванам.

Бакі пацвердзілі ўзаемную зацікаўленасць у развіцці ўзаемавыгадных кантактаў, заснаваных на ўзаемнай павазе. Ахмед Махамед Аль-Джарван (член парламента Аб’яднаных Арабскіх Эміратаў) асабліва адзначыў цікавасць у развіцці эканамічнага ўзаемадзеяння.

Уладзіслаў Татарыновіч таксама ўдзельнічаў у памятных урачыстых мерапрыемствах, прысвечаных 30-годдзю прыняцця Канстытуцыі Азербайджанскай Рэспублікі, сустрэўся са старшынёй Мілі Меджліса Азербайджана. Сагіба Гафарава адзначыла важнасць актыўнага міждзяржаўнага дыялогу паміж нашымі краінамі, асновай якога з’яўляецца поўнае паразуменне Прэзідэнтаў Беларусі і Азербайджана, высока ацаніла беларуска-азербайджанскае міжпарламенцкае ўзаемадзеянне, падкрэсліла важнасць яго далейшай актывізацыі і садзейнічання ў рэалізацыі канкрэтных праектаў у сферы медыцыны, культуры, адукацыі, у тым ліку з актыўным уцягваннем рэгіёнаў абедзвюх дзяржаў.

Па матэрыялах прэс-службы Савета Рэспублікі