Дакументам устаноўлены межы помніка прыроды, яго плошча — 356,83 га, землекарыстальнікі, зямельныя ўчасткі, часткі зямельных участкаў якіх уключаны ў склад зямель помніка прыроды — ААТ «Краснасельскбудматэрыялы» (301,01 га), Ваўкавыскі лясгас, камунальнае сельскагаспадарчае ўнітарнае прадпрыемства «Няверавічы», а таксама рэжым аховы і выкарыстання.

Вызначана, што кіраванне помнікам прыроды ажыццяўляецца Ваўкавыскім раённым турыстычным інфармацыйным цэнтрам, ААТ «Краснасельскбудматэрыялы».

Рашэнне ўступае ў сілу пасля яго афіцыйнага апублікавання.

Як паведамлялася, асноўная задача прыняцця такога рашэння — захаваць комплекс - мелавыя кар’еры пад Ваўкавыскам пад назвай «Краснасельскія Мальдывы» — для наступнага навуковага вывучэння. Навукоўцы, біёлагі, батанікі, заолагі даследуюць, як адбываецца першасная сукцэсія на гэтых тэрыторыях — змена адной біялагічнай супольнасці іншай у выніку ўздзеяння чалавека, адзначалі ў Навукова-практычным цэнтры НАН Беларусі па біярэсурсах. Другая прычына — турыстычная. Аб’яўленне кар’ераў помнікам прыроды дае магчымасць умерана выкарыстоўваць гэтыя тэрыторыі як для экалагічнага, так і для іншых відаў турызму. Акрамя таго, наданне аб’екту такога статусу кажа пра яго ўнікальнасць і каштоўнасць. «Гэта дазваляе нам на свае вочы ўбачыць тыя прыродныя рэсурсы, якія ёсць у краіне. У дадзеным выпадку гэта мелавыя пароды, узрост якіх прыкладна 90 млн гадоў. Гэта тыя карысныя выкапні, якія выкарыстоўваюцца нашай прамысловасцю, тое, чым багатая краіна», — падкрэслівалі ў НПЦ НАН Беларусі па біярэсурсах.